Facebook ընկերության աշխատակիցներն օգտվել են կողմնակի ընկերությունների ծառայություններից՝ օգտատերերի ձայնային հաղորդագրությունները վերծանելու համար: Այդ փաստը աշխարհի խոշորագույն սոցցանցի ներկայացուցիչներն ընդունել են հայտարարությամբ, որից հատվածն է հրապարակել Bloomberg գործակալությունը:
Facebook-ի ներկայացուցիչների խոսքով՝ օգտատերերի զրույցների գաղտնալսումը և ձայնագրությունն իրականացվել է միայն նրանց համաձայնությամբ և այլևս չի կիրառվում սոցցանցում: «Ինչպես և Google և Apple ընկերությունները, ավելի քան մեկ շաբաթ առաջ մենք դադարեցրել ենք վերլուծել օգտատերերի զրույցների ձայնագրությունները»,- ասվում է ընկերության պաշտոնական հայտարարության մեջ: Ըստ դրա՝ Messenger ծառայության հաղորդակից անանուն ձայնային հաղորդագրությունները վերծանելով՝ ընկերությունը ստուգել է իր ծրագրային ռոբոտի աշխատանքի արդյունավետությունը:
Տեղեկատվությունը հավաքելու նպատակը եղել է գովազդային հայտարարությունները և տեղեկատվական առաջարկները օգտատերերի պահանջներին համապատասխանեցնելը:
Միաժամանակ, ընկերության՝ ձայնային հաղորդագրությունների վերծանմամբ զբաղվող աշխատակիցները Bloomberg-ին հայտնել են, որ իրենց չի հաղորդվել ոչ ձայնագրությունների ծագումը, ոչ նպատակը՝ ինչու են դրանք վերծանվում: Երբեմն դրանք եղել են անձնական բնույթի խոսակցություններ՝ վուլգար բառապաշարով: Ընդ որում, Facebook-ն իր օգտատերերին չի տեղեկացրել, որ իրենց խոսակցությունների ձայնագրությունը կարող է հայտնվել երրորդ անձի ձեռքում:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
