«Եթե մինչեւ այս ուզում էին բիրտ ուժով ՍԴ մի շարք դատավորներից ազատվել, հիմա զուգահեռ փորձում են առաջարկել փոխզիջումային տարբերակ: Փորձում են ընդունել օրենք, որով ՍԴ դատավորներին կշահագրգռեն ժամկետից շուտ լքել պաշտոնը»,-«Sputnik Արմենիա»-ում լրագրողների հետ հանդիպմանն այսօր հայտարարեց Մարտի 1-ի գործով ՀՀ սահմանադրական կարգի տապալման համար մեղադրվող ՀՀ երկրորդ նախագահ Ռոբերտ Քոչարյանի շահերի պաշտպան, փաստաբան Հայկ Ալումյանը:
Հիշեցնենք, որ Արդարադատության նախարարության մշակած օրինագծերից մեկով՝ «Սահմանադրական դատարանի մասին» սահմանադրական օրենքում փոփոխություններ կատարելու նախագծով՝ այս տարվա օգոստոսի 1-ից հոկտեմբերի 31-ը հրաժարական ներկայացնելու դեպքում ՍԴ դատավորը մինչեւ պաշտոնավարման ժամկետը կշարունակի ստանալ աշխատավարձ, հավելավճար:
«Եթե սա արվեր ոչ Քոչարյանի գործի համատեքստում, կարելի էր հարցը քննարկել: Բայց այս պարագայում ակնհայտ է, որ այդ օրինագիծն ուղղակի նպատակ է հետապնդում Քոչարյանի գործի հետ կապված ՍԴ-ում ունենալ այնպիսի իրավիճակ, երբ ՍԴ-ն Ռոբերտ Քոչարյանի գործով չի իրականացնի արդարադատություն»,-դառնալով օրինագծին՝ համոզմունք հայտնեց Հայկ Ալումյանը:
Նրա բնորոշմամբ՝ Ռոբերտ Քոչարյանի գործի վերաբերյալ ՄԻԵԴ-ի եւ Վենետիկի հանձնաժողովի դիրքորոշումն առաջիկայում ստանալուց հետո ՍԴ-ն պետք է որոշում կայացնի Քոչարյանին առաջադրված մեղադրանքի՝ ՀՀ սահմանադրության համապատասխանելու կամ չհամապատասխանելու վերաբերյալ. «Այս ոտնձգություններն ուղղված են նրան, որ մինչեւ նշյալ կարծիքները ստանալը ՍԴ-ն արդեն չունենա այն կազմը, որն ունի այսօր»:
Կարդացեք նաև
Հայկ Ալումյանը հիշեցրեց՝ նախկին զինդատախազ Գագիկ Ջհանգիրյանը դեռեւս մոտ երկու ամիս առաջ իր հարցազրույցներից մեկում ասել է, որ ՍԴ-ն չի քննի Քոչարյանի գործի վերաբերյալ դիմումը կամ այն կքննի ոչ այսօրվա դատավորների կազմով. «Այս ամենը Քոչարյանի գործով ինչ-որ նպատակների հասնելու համար է արվում»:
Այլ մանրամասները՝ տեսանյութում
https://www.facebook.com/aravot.am/videos/2422169808002186/
Լուիզա ՍՈՒՔԻԱՍՅԱՆ
