Քաղաքապետարանը հիմնել է Երեւանի աղբահանության եւ սանմաքրման հիմնարկ, սա ապահովելու է Երեւանի մաքրությունը: Այս մասին հայտնեց քաղաքապետ Հայկ Մարությանը՝ ՀՀ վարչապետ Նիկոլ Փաշինյանի մոտ աշխատանքային քննարկման ժամանակ: Այս քննարկումն ուղիղ եթերով հեռարձակվում էր Փաշինյանի ֆեյսբուքյան էջում: Մարությանը նաեւ տեղեկացրեց՝ այս պահին համայնքային այդ հիմնարկն ունի 16 մեքենա, նոր են ձեռք բերել: «Լրիվ յուղը վրեն»,-կատակեցին վարչապետն ու քաղաքապետը: 10 հատ նոր մեքենա էլ պատվիրել են, ավելի փոքր չափսերի, ինչպես քաղաքապետն ասաց՝ որպեսզի կարողանան բակեր մտնել: Այս մեքենաները տեղ կհասնեն սեպտեմբերի վերջին, հոկտեմբերի սկզբին, 8000 հատ էլ պլաստիկից աղբաման են պատվիրել, դրանք ավելի մատչելի են եւ բարձր որակի:
Քաղաքապետը վստահեցրեց՝ հիմա Դավիթաշեն վարչական շրջանում աղբահանությունն իդեալական է.«Մեր մեքենաներն են մաքրում»: Մյուս համայնքներում այլ պատկեր է: Մարությանն ասաց, որ նույնիսկ ճանապարհաշինական տեխնիկան էին օգտագործում.«Բայց «Սանիթեքը» կարծես լրիվ չէր աշխատում: Ասում են՝ ամեն ինչ անում ենք, բայց մեքենա էլ չունեն, մեկ էլ կեսից կանգնում է մեքենան: Նկարներ են գցում ցանցում, ասում՝ «Սանիթեքի» մեքենան կանգնած է: Չգիտեմ՝ սաբոտա՞ժն է, թե՞ փչացել է»:
Աղբահանության վիճակի մասին Մարությանն ասաց.«Այսօր մի փոքր իջել է ֆոնը եւ գնալով իջնելու է: Մի փոքր բարձրանալու է սեպտեմբերին, որովհետեւ մեծ թվով քաղաքացիներ հիմա հանգստանում են, հետ են գալու, աղբը շատանալու է, բայց մեքենաներն էլ գալիս են»:
Կարդացեք նաև
Դատական գործընթացների մասին էլ քաղաքապետն ասաց. «Ոչ ոք չգիտի, թե «Սանիթեքի» հետ պատմությունն ինչպես կվերջանա, որովհետեւ մենք ասում ենք՝ եթե դուք լավ անեք, խնդրեմ, արեք, բայց եթե չանեք՝ մենք պետք է անենք: Մյուս կողմից ես չեմ կարող ե՛ւ իրենց գումարը տամ եւ էս կողմի գումարը տամ: Այս պահին այն գումարը, որ մենք ծախսում ենք մեր հիմնարկի աղբահանության համար, այդ չափով «Սանիթեքը» չի ստանալու: Մենք տուգանում ենք իրենց չկատարվող աշխատանքի համար: Ես իրենց ասել եմ՝ կամ պետք է անեք, կամ չեք անելու: Մեր իրավաբանական թիմը շատ վստահ ասում է, որ ամեն պահի մենք կարող ենք խզել, լուծել պայմանագիրը: Մենք մոտակա ժամանակներում պետք է այս հարցը լուծենք, դրա համար իրենց ասել ենք՝ ունեք ժամանակ, մտածեք, ուզո՞ւմ եք Երեւանում աղբահանություն իրականացնել, թե՞ ոչ, որովհետեւ այսպես չի կարող շարունակվել»: Մարությանն ասաց՝ 12 տարվա, այսպես ասած՝ մենաշնորհային պայմանագիր է, դեռ 4 տարի է աշխատում են, իսկ 8 տարի չեն կարող հանդուրժել նման աշխատանք:
Փաշինյանն էլ հորդորեց, որ աշխատանքները հնարավորինս արդյունավետ կատարեն, քաղաքացիներն այդ փոփոխությունները զգան:
Վերջում Փաշինյանը շնորհակալություն հայտնեց քաղաքապետին ու նաեւ կատակելով՝ իբրեւ թե հարվածում է Մարությանին, ասաց. «Պատկերացնում եմ տարբեր կողմերից ինչ ճնշումների եք ենթարկվել»:
Նելլի ԲԱԲԱՅԱՆ
