ՄԻԵԴ կայքում հրապարակվել է հաղորդագրություն, ըստ որի՝ Հայաստանի սահմանադրական դատարանը դիմել է Մարդու իրավունքների եվրոպական դատարանին՝ խնդրանքով խորհրդատվական եզրակացություն տրամադրել երկրի Քրեական օրենսգրքի այն հոդվածի վերաբերյալ, որը քրեականացնում է սահմանադրական կարգի տապալումը:
Հայաստանը երկրորդ երկիրն է, որը դիմել է նման եզրակացության համար՝ համաձայն Մարդու իրավունքների եվրոպական կոնվենցիայի 16-րդ արձանագրության: 2018թ. հոկտեմբերին նման հարցում էր կատարել Ֆրանսիան փոխնակ մայրության վերաբերյալ, դատարանը եզրակացություն էր տվել 2019թ. ապրիլին:
16-րդ արձանագրությունը թույլ է տալիս բարձրագույն դատարաններին և տրիբունալներին խորհրդատվական կարծիք հայտնել այնպիսի հարցերի վերաբերյալ, որոնք վերաբերում են Եվրոպայի կոնվենցիայով կամ արձանագրություններով սահմանված ազատությունների և իրավունքների մեկնաբանությանը և կիրառմանը:
Հայաստանի սահմանադրական դատարանը նշել է, որ իր հարցումն արվել է Քրեական օրենսգրքի 300.1 հոդվածի սահմանադրականության վերաբերյալ երկու գործերի համատեքստում՝ մեկը Երևանի ընդհանուր իրավասության առաջին ատյանի դատարանի կողմից, մյուսը՝ Հայաստանի երկրորդ նախագահ Ռոբերտ Քոչարյանի:
Կարդացեք նաև
Քրեական օրենսգրքի 300.1 հոդվածը վերնագրված է «Սահմանադրական կարգի տապալում»: Իր հարցման մեջ Սահմանադրական դատարանը մասնավորապես խնդրել է պարզաբանում տալ Եվրոպական կոնվենցիայի Հոդված 7-ի (ոչ մի պատիժ առանց օրենքի (no punishment without law)) որոշ ասպեկտների վերաբերյալ, ինչպիսիք են «օրենք» (law) կոնցեպտը այդ դրույթի նշանակության շրջանակում, օրենքի որոշակիություն, հասանելիություն, կանխատեսելիություն և կայունություն հասկացությունները, ինչպես նաև քրեական օրենքի՝ հետադարձ ուժ չունենալու սկզբունքը:
Խորհրդատվական եզրակացության համար կարելի է դիմել միայն այն գործերի վերաբերյալ, որոնք ընթանում են տեղի դատարանում: Հարցումն ընդունելը կամ մերժելը մնում է Դատարանի հայեցողությանը: 5 դատավորներից բաղկացած կոլեգիան պետք է որոշի՝ արդյոք ընդունում է հարցումը, թե ոչ՝ պատճառաբանելով մերժումը: Մեծ պալատի տված եզրակացությունն ունի խորհրդատվական, և ոչ թե պարտադիր բնույթ: Կարծիքները հրապարակվում են և հասցվում հարցումն ուղարկող դատարանի գիտությանը: Դատավորներն իրավունք ունեն առանձին եզրակացություններ տալ:
Պատրաստեց՝ Վիկտորյա ԱՆԴՐԵԱՍՅԱՆԸ
