2008 թվականի մարտի 1-ի գործերը կվերանայվեն: Այս մասին Aravot.am-ի հետ զրույցում ասաց ՀԱԿ իրավական հարցերով պատասխանատու Արմեն Խաչատրյանը: Այն գործերը, որոնցում կլինեն նոր երեւան եկած հանգամանքներ, դատական սխալ կամ դրանցում կլինի արդարադատության էության խախտում՝ նորից կքննվեն:
Հիշեցնենք, երեկ Հայաստանի հելսինկյան ասոցիացիա հ/կ ներկայացուցիչ Նինա Կարապետյանցը, Ժուռնալիստներ հանուն մարդու իրավունքների հ/կ ներկայացուցիչ Ժաննա Ալեքսանյանը, Իրավունքի եւ ազատության կենտրոն հ/կ ներկայացուցիչ Վարդան Հարությունյանը եւ ՀԱԿ իրավական հարցերով պատասխանատու Արմեն Խաչատրյանը հանդիպել են ՀՀ Գլխավոր դատախազի Արթուր Դավթյանի հետ։ Հանդիպման նախաձեռնողները հ/կ ներկայացուցիչներն են եղել։ Քննարկվել է քաղաքական դրդապատճառներով դատապարտված մարդկանց արդարացումը։
Ենթադրվում է, որ վերանայումներից հետո կլինեն արդարացման վճիռներ, իսկ ՀՀ քրեական դատավարության օրենսգրքով սահմանված է, որ արդարացվողն ունի պետությունից փոխհատուցում ստանալու իրավունք: «Եթե որեւէ մեկը ցանկություն կունենա դիմելու եւ վնասի փոխհատուցում ստանալու, դա կլինի իր իրավունքը»,- ասաց Արմեն Խաչատրյանը:
Հետաքրքրվեցինք` ժամանակին քաղաքական կոնյուկտուրայից ելնելով վճիռներ կայացրած դատավորների համար պատիժներ սահմանվա՞ծ են: «Եթե կունենանք բավարար ապացույցներ կամ առերեւույթ հանցագործության մասին կունենանք փաստական տվյալներ, առնվազն կդիմենք դատախազին` քրեական գործեր հարուցելու պահանջով»,- պատասխանեց մեր զրուցակիցը:
Կարդացեք նաև
Թե գործերի վերանայման գործընթացը երբվանի՞ց կսկսվի, հարցին էլ Արմեն Խաչատրյանն այսպես արձագանքեց. «Գործընթացը մեծ հաշվով սկսված է. այս պահն ՀՀ վճռաբեկ դատարանում կա երեք դիմում, որոնցից երկուսը վարույթ են ընդունված: Խոսքը Մուշեղ Սաղաթելյանի եւ Արամ Բարեղամյանի գործերի մասին է: Մուշեղ Սաղաթելյանի գործով անգամ վճռաբեկը որոշում է կայացրել`ուղարկել վերաբացման`առաջին ատյանի դատարան: Արամ Բարեղամյանի բողոքը վճռաբեկ դատարանի վարույթում է եւ մեկ բողոք էլ վերջերս է գնացել, արդեն արդարադատության բուն էության խախտման փաստով»:
Հարցին`նախկինում`1995-96 թվականներից սկսած եղած քաղաքական դատավարություններով եւ անօրինական վճիռներով գործերով ե՞ւս վերանայումներ կլինեն, մեր զրուցակիցը օրինակ բերեց Աշոտ Բլեյանի գործը եւ հավելեց. «Մեր հանդիպումը վերաբերելի է եղել մարտի 1-ի գործերին, բայց դա չի նշանակում, որ որեւէ մեկն իրավունք չունի դիմելու այն բոլոր հիմքերով, որոնք թվարկեցի: Մենք դատախազի հետ չենք քննարկել 2008-ին դատապարտված, ազատազրկված անձանց արդարացված հայտարարելու մասին հարցը, մենք զբաղվել ենք մաքուր իրավաբանությամբ`գործերը կվերանայվեն ՀՀ քրեական դատավարության, գործող օրենսգրքի նորմերին համապատասխան: Վերջին տասը տարիներին մենք այդ ճանապարհով չէինք գնում, որովհետեւ քաղաքական իշխանությունը, իրավապահ համակարգը թույլ չէր տա, որպեսզի օբյեկտիվ քննություն անցկացվեր, հիմա, կարծում ենք, որ այդ արգելքը հաղթահարված է եւ հիմքեր ունենք վստահելու դատախազությանը, որ օբյեկտիվ քննություն կանցկացվի»:
Նկատենք, որ 2008-ի մարտի 1-ի գործով դատապարտված է նաեւ ՀՀ վարչապետ Նիկոլ Փաշինյանը`զանգվածային անկարգություններ կազմակերպելու հոդվածով: Նիկոլ Փաշինյանի գործը նույնպե՞ս կվերանայվի` հարցին, Արմեն Խաչատրյանը պատասխանեց. «Ես որեւէ տարբերություն, այդ իմաստով, չեմ դնում»:
Ժուռնալիստներ հանուն մարդու իրավունքների հ/կ ներկայացուցիչ Ժաննա Ալեքսանյանն էլ մեզ հետ զրույցում հավաստիացրեց, որ իր տպավորությամբ, դատախազությունը պատրաստակամ էր:
Նելլի ԳՐԻԳՈՐՅԱՆ
Լուսանկարը՝ Արման ՎԵԶԻՐՅԱՆԻ
