«Չէի ուզենա, որ Նիկոլ Փաշինյանի այս ծրագրային ելույթը հերթական ամբոխահաճո դրսևորումը լիներ, կուզենայի, որ այն ունենար հետևանքներ և դրանք լինեին գործնական ու ներկայացնելի հանրությանը, և հանրության մոտեցումներն այդ իմաստով հաշվի առնվեին»,-«Հայելի» ակումբում լրագրողների հետ հանդիպմանը, անդրադառնալով Ստեփանակերտի Վերածննդի հրապարակում ՀՀ վարչապետ Նիկոլ Փաշինյանի ելույթին, այսպիսի կարծիք հայտնեց «Ազգային օրակարգ» կուսակցության համահիմնադիր Արա Հակոբյանը:
Ըստ նրա՝ առաջին անգամ վարչապետն իր ելույթում այդքան շատ թիվ է ներկայացնում. «Երեսուն տարվա կտրվածքով թիվ ներկայացնելը բավականին ապահով բան է, քանի որ եթե դու դա չես հիմնավորում՝ ենթածրագրերը ժամանակացույցերով և հանգրվանային արդյունքներով, ապա կարելի է ասել մի թիվ, հետո այդ թվի չիրականացումը կամ պատասխանատվությունը լինի քեզնից դուրս: Չնայած վարչապետն ինքն ասաց, որ հետագայում լինելու են ծրագրեր, որոնցով հիմնավորված են հնարավոր արդյունքները, բայց կսպասենք, կտեսնենք: Առ այս պահը հիմնավորող կամ համոզիչ դրույթներ այդ թվերի հասանելիության մասին դեռ չկան»:
Անդրադառնալով Ստեփանակերտում հնչեցված` Արցախը Հայաստան է և վերջ թեզին՝ Արա Հակոբյանն ասաց. «Մենք կարծում ենք, որ ՀՀ-ն Արցախի Հանրապետությունն է և ՀՀ-ն է միասին վերցրած: Ու դա է Հայաստանը և վերջ. այս պահին է դա ՀՀ-ն: Հույս ունենք, որ ապագայում ՀՀ-ն կլինի ավելի ընդգրկուն իր կենսատարածքով, քան Արցախն ու ՀՀ-ն միասին վերցրած: Միացում՝ որպես այդպիսին Հայաստանի տեսլականից արդեն իրականացվել է, և մենք պետք է այդ միացումը վերածենք փաստացի արդյունքի: Դա նշանակում է, որ բանակցային սեղանին պետք է փոխվեն այն դրույթները, որոնք կոչվում են մադրիդյան, քանի որ դրանց առկայության պարագայում չի ստացվելու Արցախը ՀՀ-ն է և վերջ: Եթե վարչապետը նկատի ունի ԼՂ-ն, եկեք այդ ճշտումն անենք, քանի որ մենք Արցախ հասկանում ենք հայրենիքի այն հատվածները, որոնք Արցախի սահմանները դիտարկում են որպես Արցախի տարածք»:
Նիկոլ Փաշինյանի՝ կոնսենսուսային դրույթների մասին Արա Հակոբյանն ասաց. «Ամեն դրույթ առանձին վերցրած հրաշալի է, բայց պետք է հասկանալ, թե ինչ նկատի ունի Նիկոլ Փաշինյանը դրանք ասելիս: Նա ասում է՝ ժողովրդի կամարտահայտությունը գերակա իշխանություն է, բայց մյուս կողմից ասում, որ ՀՀ-ն երաշխավոր պիտի լինի Արցախի ընտրություններին: Ի՞նչ նկատի ունի: Մի կողմից ասում է, որ ՀՀ-ն չի կարող Արցախը ներկայացնել բանակցությունների ժամանակ, մյուս կողմից ասում, որ ՀՀ-ն Արցախի ընտրությունների երաշխավորն է: ՀՀ-ն այդ տեսակետից ի՞նչ դիրք ունի, իր երաշխավորությունն ի՞նչ մեխանիզմով է իրականացնելու, արդյոք չի՞ նշանակում, որ շեղվում ենք մինչև այդ Նիկոլ Փաշինյանի արտահայտած մոտեցումից»:
Կարդացեք նաև
Արա Հակոբյանը փաստեց՝ կողմ են, որ ինտեգրացիոն գործընթացները Արցախի և ՀՀ-ի իրականացման և իրականացման հնարավորության արագ և հնարավորինս արդյունավետ լինեն: Ու նշեց, որ ուզում են տեսնել ինտեգրացիոն գործընթացների բովանդակությունը, ժամանակացույցը և թե ինչպես պիտի լինի, երբ պիտի գանք այն կետին, որ միասնական ՀՀ-ն դարձնենք իրողություն:
Սփյուռքի հայության ներդրումային մոտեցումների մասին Նիկոլ Փաշինյանի հայտարարությունների մասին խոսելով՝ Արա Հակոբյանն ասաց. «Վարչապետն ասում է՝ ունենք սփյուռքի հանձնակատար, բայց դա ավելի քիչ չէ՞, քան սփյուռքի նախարարությունը, որ մինչ այդ ունեինք, արդյոք այդ ավելի պակաս լիազորություն չէ՞, քան սփյուռքի նախարարությունը և դա չի՞ նշանակում, որ պակաս արդյունավետ կարող է գործել սփյուռքի հանձնակատարը, քան նախարարությունը»:
«Ազգային օրակարգ» կուսակցության համահիմնադիր Արա Գասպարյանի կարծիքով՝ հեղափոխության արտահանման թեզը վտանգավոր է. «Ի՞նչ է նշանակում առաջնագծից քսան-երեսուն կիլոմետր խորքում հայտարարություն անել հեղափոխության արտահանման մասին: Դա մեր ռազմավարական թիկունքն է, և ռազմավարական թիկունքում տարբեր տեսակի հեղափոխական գործընթացներն ուղղական սպառնալիք են մեր անվտանգությանը: Այս հարցում շատ ուշադիր պետք է լինել»:
Արա Գասպարյանը, Նիկոլ Փաշինյանի այն հայտարարության մասին, թե կառավարման համակարգը գտնվում է կաթվածային վիճակում, հարց տվեց՝ մի օրենք ընդունե՞լ են, որ այդ խնդիրը լուծվի ու շարունակեց. «Հիբրիդային պատերազմում գտնվող երկրում հայտարարություն է արվում, իսկ հակառակորդն ուշադիր հետևում է: Երկիրը, որը գտնվում է հիբրիդային պատերազմում և վարչապետը ինստիտուտների կաթվածի մասին հայտարարություն է անում, սրանից ի՞նչ ենթադրություններ պիտի անեն Ադրբեջանում որոշում ընդունողները: Կան խնդիրներ մեր կառավարման համակարգում, կան խնդիրներ կոռուպցիայի հետ կապված, նախկինում էլ են եղել, բայց մերկապարանոց հայտարարել ինստիտուտների կաթվածի մասին, կարծում եմ մի փոքր չափազանցեցված են: Վերջապես, եթե դուք տարուց ավելի գտնվում եք իշխանության մեջ, տարի ու կես հետո հասկանում եք, որ ինստիտուտների կաթվածի հետ գործ ունեք, ինչո՞ւ դրա մասին իշխանությունը ստանձնելուց երկու-երեք ամիս հետո չասացիք կամ իշխանությունը ստանձնելուց հետո մի օրենք ինստիտուտների վերափոխումների հետ կապված ընդունե՞լ եք»:
Տաթև ՀԱՐՈՒԹՅՈՒՆՅԱՆ
