Մոսկվաբնակ գործարար Սարգիս Մինասյանը մտադիր է ՌԴ մայրաքաղաքում գործող աղբի վերամշակման գործարանի աշխատանքը կազմակերպել նաեւ Երեւանում: Նրա խոսքով՝ հնարավոր կլինի օրական մոտ 200 տոննա աղբ տեսակավորող եւ վերամշակող գործարան հիմնել: Երեւանի քաղաքապետարանն էլ ամիսներ առաջ առաջարկել է ներկայացնել գործարար-ծրագիր, որը գրավոր տարբերակով հանձնվել է օրերս՝ մոսկովյան համապատասխան ընկերության երաշխավորագրով: Թե ինչ առաջարկներ ունի գործարարը, այսօր «Փաստարկ» մամուլի ակումբում լրագրողների հետ հանդիպմանը նա նախ շեշտեց՝ հայաստանյան աղբանոցները որպես այդպիսին անվանելը դժվար է, որովհետեւ դրանք պետք է լինեն աղբի ընդունման կետեր, որտեղից սկսվում է աղբի վերամշակումը, ոչ թե բարձիթողի վիճակում գտնվող աղբակույտեր:
Գործարար-ծրագրում Սարգիս Մինասյանը նշել է, որ մասնավորապես Նուբարաշենի աղբավայրում անհրաժեշտ է կառուցել ըստ տոննայի կշռման աշխատող աղբի ընդունման կետեր, ինչը մասնավոր ընկերություններին կշահագրգռի ավելի շատ աղբ հավաքագրելու հարցում. «Հնարավոր կլինի մինչեւ 400 տոննա աղբ տեսակավորել եւ դրանք ուղղել երկրորդական արտադրության գործարաններ: Աղբավայրերում պետք է տեղադրվեն կշեռքներ, թաղապետարաններն էլ պետք է տրամադրեն տեղափոխման համար անհրաժեշտ վճարովի հիմունքներով 1-2 բեռնատար մեքենաներ: Անհատները՝ բնակիչները, հաստատ կցանկանան համայնքային մեքենաներով աղբ տեղափոխել եւ գումար վաստակել»:
Ըստ Մինասյանի՝ թղթի թափոնների վերամշակումից Հայաստանում հնարավոր է ստանալ ձվի տուփեր, պլաստմասե շշեր, որոնց համար անհրաժեշտ հաստոցներն ինքն ունի, իսկ հնարավորության դեպքում աղբի վերամշակումը կարելի է կազմակերպել նաեւ Մոսկվայում:
Սարգիս Մինասյանը հավելեց, որ իր գործարար-ծրագիրը Երեւանի քաղաքապետարանում արդեն բանավոր ներկայացրել է, բայց մերժում է ստացել. «Պատճառաբանել են, որ արդեն զբաղվում են Նուբարաշենի աղբավայրի խնդրով: Հուսամ՝ գրավոր ծրագրին կարձագանքեն»:
Կարդացեք նաև
Այլ մանրամասները՝ տեսանյութում
https://www.facebook.com/aravot.am/videos/721517051641358/
Լուիզա ՍՈՒՔԻԱՍՅԱՆ
