Օգոստոսի 18-ին Ախթալայում 11-րդ անգամ կկայանա Խորովածի համահայկական փառատոնը: Այս անգամ փառատոնին կմասնակցի խոհարարների 20 թիմ: Երեւանից գրանցվել է 14 հայտնի ռեստորան: Թե ինչ խոհարարական անակնկալներ են սպասվում մասնակիցներին և հյուրերին, այս մասին «Սպուտնիկ Արմենիայի» մամուլի սրահում պատմեցին Հայ խոհարարական ավանդույթների զարգացման և պահպանման հասարակական կազմակերպության նախագահ Սեդրակ Մամուլյանը եւ Տուրիզմի հայկական ֆեդերացիայի նախագահ Մեխակ Ապրեսյանը:
Մեխակ Ապրեսյանը նշեց, որ ավանդական դարձած փառատոնը միջազգային նշանակություն ունի, այն տարածաշրջանում ամենակայացած եւ սպասված փառատոնն է, որին մասնակցելու համար աշխարհի տասնյակ երկրներից հազարավոր մարդիկ այցելում են Հայաստան:
«Մեր առաջ նպատակ էինք դրել, որ պետք է գա մի օր, որ զբոսաշրջիկները հենց այս փառատոնի համար այցելեն Հայաստան, նույնիսկ ընտրեն, օրինակ` Բրազիլիայի դիմակահանդեսին մասնակցե՞ն, թե Հայաստանի խորովածի փառատոնին…Եվ դա այսօր իրականություն է դարձել»,-հայտնեց Մեխակ Ապրեսյանը: Նրա խոսքով, նման փառատոները նպաստում են հյուրընկալող եւ շրջակա համայնքների տնտեսական ակտիվացմանը, ներդրումների գրավմանը:
Սեդրակ Մամուլյանը նշեց, որ ժամանակին փառատոնի վերաբերյալ թերահավատությունը շատ էր, որովհետեւ սկսել էին այն ժամանակ, երբ խոհարարական միջոցառումներ չէին կայանում: Նա ասաց, որ Ախթալայի ընտրությունն էլ պատահական չէր, որովհետեւ պետական ծրագիր կար՝ հյուսիսային դարբասների մոտ զբոսաշրջությունը զարգացնելու: Նաեւ խնդիր կար՝ կապված տարածքների համաչափ զարգացման, զբոսաշրջային միջավայր զարգացնելու, ազգային խոհանոցը հանրահռչակելու հետ:
Կարդացեք նաև
Պարոն Մամուլյանը հավելեց, որ միջոցառումը ունի հստակ ծրագիր՝ գեղարվեստական մաս, որտեղ կլինի ազգագրական երգ-երաժշտություն, մրցութային մաս՝ ավանդական անվանակարգերով (լավագույն համ, լավագույն տեսք, լավագույն մտահղացում), նաեւ բոլոր մասնակիցները հնարավորություն կունենան հենց տաղավարի շուրջ ունենալու նստած սպասարկվելու հնարավորություն: Ասաց, որ մեծ արձագանքներ են ստացվել Վրաստանից եւ Ռուսաստանից, տեղի զբոսաշրջիկները մեծ ցանկություն են հայտնել այցելել փառատոնին:
Սեդրակ Մամուլյանը փաստեց, որ հենց փառատոնի շնորհիվ է, որ շրջակա տարածքները բարեկարգվել են եւ արժանացել զբոսաշրջիկների ուշադրությանը:
Գոհար ՀԱԿՈԲՅԱՆ
