«Ամերիկայի ձայն». Ռուսաստանի բնակչությունը մի քանի տասնամյակում զգալիորեն կնվազի: Այս զարգացումը մեծ ազդեցություն կունենա երկրի տնտեսական վիճակի վրա: Առաջնային խնդիրներից է կրթություն ստացած երիտասարդ մասնագետների արտահոսքը երկրից:
Ռուսաստանի Պերմ քաղաքում, ինչպես բազմաթիվ այլ շրջանային բնակավայրերում, երիտասարդները ցանկանում են արտագաղթել:
«Ես ինձ ապահով չեմ զգում այստեղ: Այս երկրում բացակայում է կայունություն»,- ասում է Դմիտրի անունով մի երիտասարդ:
Դմիտրին մասնագիտությամբ ինժեներ է Պերմի գործարաններից մեկում: Քաղաքը տեղակայված է Մոսկվայից մոտ 1500 կմ հեռավորության վրա: Ինչպես Ռուսաստանի շատ շրջանային քաղաքներում այստեղ ևս բնակչության կարևոր խնդիրներից է ցածր աշխատավարձերը, որը նպաստում է արտագաղթի ուժեղացմանը: Նվազագույն աշխատավարձը տատանվում է 400-600 դոլարի սահմաններում:
Կարդացեք նաև
Gallup-ի վերջին հարցումները ցույց են տալիս, որ նախագահ Վլադիմիր Պուտինի կողմնակիցների 12 տոկոսը ցանկանում է լքել երկիրը: Նրա քաղաքականության հակառակորդների շարքում այդ թիվը կազմում է 40 տոկոս:
Ռուսաստանի նավթագազային սեկտորը երկրի հիմնական տնտեսական ոլորտներից է, որը կազմում է երկրի արտահանման շուրջ 60 տոկոսը: Պերմի պոլիտեխնիկական համալսարանը կարևոր կրթական հաստատություններից է էներգետիկ ոլորտի մասնագետներ պատրաստելու համար: Այս համալսարանի ուսանող Մաքսիմը ցանկանում է մնալ և աշխատել Ռուսաստանում: Նա աշխատանքի է անցել Լուկոյլ նավթային ընկերությունում:
Դրա հետ մեկտեղ, սակայն, նա չի բացառում, որ կարող է աշխատել արտասահմանում համապատասխան աշխատանքի առաջարկ ստանալու դեպքում:
Ռուսաստանում ուսուցում անցնող արտասահմանցի ուսանողները գոհ են այստեղի համալսարանների մակարդակից:
«Այստեղ թե՛ կրթության մակարդակը, թե՛պայմանները բավականին բարձր են: Նյու Յորքում չեմ կարծում հնարավոր կլինի համարժեքը գտնել մատչելիության առումով»,- նշում է իրաքցի ուսանող Հանի Մուհամեդ Ֆալիհը:
Հանին համալսարանը ավարտելուց հետո ցանկանում է վերադառնալ Իրաք, սակայն եթե աշխատանքի առաջարկ ստանա Ռուսաստանում, կընդունի այն:
Երեխաների եւ դեռահասների համար ֆինանսական ոլորտի գրքերի հեղինակ Էդուարդ Մատվեևը իր հերթին նշում է, որ գլոբալիզացիան և համացանցը մեծապես ազդել են ռուսաստանցիների հայացքների վրա:
«Կարծում եմ երիտասարդ ռուսաստանցիները ոչնչով չեն տարբերվում աշխարհի այլ երիտասարդներից: Նրանք չեն դիտարկում արտագաղթը որպես դավաճանություն հայրենիքին, ինչպես դա անում էր նախորդ սերունդը: Նրանք դա ընկալում են որպես աշխարհը ճանաչելու սովորական գործընթաց»,-նշում է Մատվեևը
Այսպիսով Ռուսաստանի զարգացած ոլորտներն այսօր շարունակում են գրավել երիտասարդ տաղանդավոր մասնագետների: Սակայն դրա հետ մեկտեղ ռուսաստանցի շատ երիտասարդներ ավելի լավ ապագա են փնտրում երկրի սահմաններից դուրս, ինչպես ֆինանսական միջոցների, այնպես էլ քաղաքական վիճակի պատճառով:
Արամ ԱՎԵՏԻՍՅԱՆ
