«Եռաբլուր»-ում այսօր հավաքվել էին Հայաստանի ազատագրության հայ գաղտնի բանակի՝ ԱՍԱԼԱ-ի մարտիկները, ԱՍԱԼԱ-ի նահատակների հարազատներն ու ժառանգները՝ հուշաքարի մոտ ոգեկոչելու զոհված մարտիկների հիշատակը: 37 տարի առաջ՝ 1982 թ. օգոստոսի 7-ին, ԱՍԱԼԱ-ի «Խրիմյան Հայրիկ» մահապարտների ջոկատը Զոհրապ Սարգիսյանի գլխավորությամբ իրականացրեց «Կարին» գործողությունը՝ գրավելով Անկարայի «Էսենբողա» միջազգային օդակայանը: «1983թ.-ի այս օրը մեր երկու ընկերները հարձակվեցին թուրքական օդակայանի վրա, որը հսկում էր հիմնականում թուրքական բանակը: Շատերը դրանում քաղաքական բան են տեսնում, բայց այն բանակի հսկողության ներքո էր: Զոհրապը ռումբեր պայթեցրեց, բարձրաստիճան զինվորականներ սպանվեցին: Լեւոն Էքմեքճյանն էլ ծանր վիրավորվեց, բռնվեց, եւ մեկ տարի անց կախաղան բարձրացվեց»,-Aravot.am-ի հետ զրույցում պատմեց ԱՍԱԼԱ-ի մարտիկ, «Վան» գործողության հրամանատար Վազգեն Սիսլյանը:
Նրա բնորոշմամբ՝ օդակայանի գրավման գործողությունը մեծ աղմուկ էր բարձրացրել, ուստի ԱՍԱԼԱ-ն որոշեց Թուրքիայի հողում նահատակված իր ընկերների հիշատակի օր սահմանել: Վազգեն Սիսլյանի խոսքով՝ գործողության ուղերձն է՝ ապրել հայ, մնալ հայ եւ հավատարիմ մնալ հայի պայքարին եւ իրավունքներին. «Պետք չէ ուրախանալ Մասիս սարի գեղեցկությամբ, քանի դեռ այն մերը չէ…եթե ուրախանում ենք, ուրեմն պետք է ազատենք այն գերությունից, չէ՞…ճիշտն ասած՝ ես չեմ սպասում, որ «Կարին» գործողությունը ներկայիս ՀՀ-ում քաղաքական գնահատականի արժանանա, որովհետեւ ժողովրդի գնահատականն ու վերաբերմունքն ավելի կարեւոր է, քան քաղաքական մարդկանց: Եթե ոմանք կարծում են, որ մեր պայքարն արկածախնդրություն էր կամ հետաքրքրություն, սխալվում են: Շատերն են այդպես՝ սխալ մտածում, բայց մենք հո գիտենք, թե ինչ ծանր բեռ ենք կրել: Մեկը մեզ անվանում է «ահաբեկիչ», մյուսը՝ քննադատում, բայց ոչինչ, բոլորին էլ կդիմանանք(ժպտում է.-խմբ.)»:
Լուիզա ՍՈՒՔԻԱՍՅԱՆ
