Երեկ Հայ եկեղեցու համաշխարհային երիտասարդական միավորման հրավերով կառույցի կենտրոնական գրասենյակում մասնակցեցի «Կանանց նկատմամբ բռնության և ընտանեկան բռնության կանխարգելման և դրա դեմ պայքարի մասին» ԵԽ կոնվենցիայի մասին քննարկմանը։
Կարևորելով հանրային երկխոսությունը՝ ես և արդարադատության նախարարի տեղակալ Քրիստիննե Գրիգորյանը երեքուկես ժամ տևած հանդիպման ընթացքում մանրակրկիտ անդրադարձանք ընտանեկան բռնության և կանանց հանդեպ բռնության կանխարգելմանը, համբերատար պատասխանեցինք ներկաների բոլոր հարցերին։
Նույնիսկ այս պարագայում, սակայն, մասնակիցներից ոմանք ագրեսիվ և անհարգալից վարվեցին ներկաների և կառավարության անդամների նկատմամբ։
Ինչպես հրավիրող կողմն էր վստահեցնում՝ հանդիպման նպատակը կառուցողական և գաղափարական քննարկման հարթակ ստեղծել էր։ Ցավում եմ, որ ՀԵՀԵՄ-ի անդամները ջերմ հարաբերությունների մեջ են ատելության խոսք տարածող հայտնի «Կամք» նախաձեռնության անդամների հետ և հանդուրժող են նրանց՝ ՀՀ քաղաքացուն և քրիստոնյային անվայել վարքագծի հանդեպ։ Ցավում եմ նաև, որ տեղում քայլեր չձեռնարկվեցին կանխելու նրանց անպարկեշտ պահվածքը, որը հնարավոր էր կանխատեսել։
Կարդացեք նաև
Ստեղծված իրավիճակը, ի վերջո, բերեց նրան, որ հանդիպման վերջում նրանք հրապարակային անձնական վիրավորանք հասցրեցին ինձ։
Որպես քրիստոնյա՝ ես այլ կերպ եմ պատկերացնում եկեղեցականի և եկեղեցու հետ որևէ կապ ունեցող կառույցի առաքելությունը՝ առանց բռնության, հարգանքի վրա հիմնված միջավայր ապահովելը, բռնությունը ոչ միայն մերժելն ու կանխելը, այլ նաև լայն մեկնաբանությունների հնարավորություն չընձեռող դատապարտումը։
Որպես կառավարության անդամ՝ շարունակելու եմ հավատարիմ մնալ մարդու իրավունքների սկզբունքներին և աջակցելու եմ սոցիալական պաշտպանության կարիք ունեցող ՀՀ բոլոր քաղաքացիներին, ներառյալ այն կանանց, որոնք ենթարկվել են բռնության։
Հ.Գ. Պատրաստվում եմ օգտվել սահմանադրական երաշխիքներից՝ պաշտպանելու արժանապատվությունս և խտրականությունից պաշտպանված լինելու իրավունքս։
Զարուհի ԲԱԹՈՅԱՆ
ՀՀ աշխատանքի և սոցիալական հարցերի նախարար
«Առավոտ». ՀԵՀԵՄ-ը երեկ հաղորդագրության մեջ ներողություն էր խնդրել կատարվածի համար՝ մասնավորապես նշելով. «Լսեցինք և´ կողմ, և´ դեմ կարծիքներ, հիմնավորումներ, նաև եղան գործնական լուծումներ ու առաջարկներ, որպեսզի օգնենք մեր կառավարությանը ավելի արդյունավետ պայքարել բռնության դեմ, ինչն անշուշտ անընդունելի է և դատապարտելի՝ իր բոլոր դրսևորումներով հանդերձ։ Բռնությունը տեղ չունի հայ հասարակության մեջ և այն պետք է արմատախիլ անել։ Բոլոր մասնակիցները արձանագրեցին իրենց խորը հարգանքը կոնվենցիայի վերաբերյալ Հայաստանի թեմակալ առաջնորդների հայտարարության վերաբերյալ, որով կոչ էր արվում հայրենի իշխանությանը չվավերացնել այն: Շնորհակալություն եմ հայտնում բոլոր մասնակիցներից, միաժամանակ ներողություն խնդրում չնախատեսված հուզական պոռթկումների եւ անձնական վիրավորանքների համար, որոնք կանխել չհաջողվեց»:
