«Գործի նյութերում նման հանգամանքներ չկան»,-«Հայելի» մամուլի ակումբում լրագրողների հետ հանդիպմանն այսօր անդրադառնալով BBC-ի տրամադրության տակ հայտնված տվյալներին, ըստ որոնց՝ Մարտի 1-ի իրադարձությունների ժամանակ նախագահականում Արցախից բերված հատուկ ջոկատայինների խումբ է պահվել, որին այցելել են Ռոբերտ Քոչարյանը եւ Սերժ Սարգսյանը, ասաց Մարտի 1-ի գործով ՀՀ սահմանադրական կարգի տապալման համար մեղադրվող ՀՀ երկրորդ նախագահ Ռոբերտ Քոչարյանի շահերի պաշտպան, փաստաբան Արամ Օրբելյանը:
Քոչարյանի շահերի պաշտպան Հովհաննես Խուդոյանն էլ նկատեց՝ BBC-ի հոդվածում հղումն արվում է նշյալ «ջոկատը» ղեկավարած Սամվել Կարապետյանի հարցաքննության արձանագրությանը. «Եթե քննիչը հարցադրում է արել ինչ-ինչ հանգամանքների մասին, դա չի նշանակում, որ գործով դա հաստատվել է: Չկա մեկ ցուցմունք, որով այդ հանգամանքը հաստատված է: Եթե լիներ, վաղուց աղմուկը լսած կլինեիք, վաղուց դա մեղադրական եզրակացության մեջ ներառված կլիներ»:
Հովհաննես Խուդոյանը շեշտեց, որ Սերժ Սարգսյանի եւ Լեւոն Տեր-Պետրոսյանի՝ մամուլում հրապարակված ցուցմունքներից կարելի է տեսնել քննիչների հարցաքննությունների որակը. «Հնարավոր է՝ սադրիչ հարցեր տան: Վկային իրավական բնույթի հարցեր են տվել: Նման որակով քննության պարագայում հարցերը հերքվել են հենց վկաների կողմից»:
Խուդոյանն էլ իր հերթին պնդեց, որ BBC-ում հրապարակվածը չի համապատասխանում իրականությանը եւ չի բխում գործի նյութերից:
Կարդացեք նաև
Արամ Օրբելյանն էլ անդրադարձավ ՀՀ ԱԱԾ ղեկավար Արթուր Վանեցյանի երեկվա հայտարարությանն այն մասին, որ Մարտի մեկի գործի որոշակի փաստաթղթեր են անհետացել: «Կդժվարանամ ասել, թե ինչ փաստաթղթերի մասին է խոսքը, բայց մենք դիմել էին քննչական մարմին, որպեսզի ստանանք գործի նյութերի՝ մեզ առնչվող մասի պատճեն: Ընդհանուր 500-600 հատոր է գործը: Գտնում ենք, որ չնայած մի շարք իրավական խնդիրներին, հատորներում առկա որոշ նյութեր հակասում են մեղադրանքում դրված ձեւակերպումներին: Մեզ մերժել են տրամադրել գործի նյութերն ամբողջությամբ, ուստի չենք կարող ասել՝ ի՞նչն է անհետացել, իսկ ինչը՝ ոչ»:
Այլ մանրամասները՝ տեսանյութում
https://www.facebook.com/aravot.am/videos/2326209111024380/
Լուիզա ՍՈՒՔԻԱՍՅԱՆ
