Վարչապետ Նիկոլ Փաշինյանը երեկ, խոսելով Սերժ Սարգսյանի օրոք՝ 2014-ին կազմած գաղտնի փաստաթղթի մասին, ուշագրավ հայտարարություն արեց: Նախ, նա ասաց, որ այդ փաստաթուղթն այնքան գաղտնի է, որ ճիշտ չի համարում անունը նույնիսկ բարձրաձայնել. «Այդ փաստաթուղթը կարեւոր է նրանով, որ տալիս է ամբողջական պատկերացում, թե ինչ վիճակում է մեր երկիրը, կամ ինչ վիճակում է եղել մեր երկիրը, որովհետեւ այն պրոբլեմները, ինչն այստեղ գրված են, բնականաբար, մեկ տարվա ընթացքում հնարավոր չէր լինի շտկել: Բայց շատ կարեւոր էր արձանագրել, եւ այս փաստաթուղթը նաեւ այդ առումով է կարեւոր, թե մենք ինչ իրավիճակում ենք ժառանգել ՀՀ-ն: Երբ որ այս փաստաթուղթը մենք կարդում ենք, եզրակացությունը հետեւյալն է՝ հեղափոխության ժամանակաշրջանում եւ ինչ-որ առումով նաեւ դրանից հետո մեր երկիրը գտնվում է ինստիտուցիոնալ կաթվածահար վիճակում: Սա, ըստ էության, փաստաթուղթ է այն մասին, որ մեր երկրում, ըստ էության, պետական ինստիտուտները կաթվածահար են, եւ ինստիտուցիոնալ առումով մեր երկիրն ամբողջությամբ ձախողված է:
Aravot.am-ը նախկին կառավարության ներկայացուցիչ, արդարադատության նախկին նախրար Դավիթ Հարությունյանին հարցրեց՝ 2014-ին, երբ այդ փաստաթուղթը կազմվել է, դուք կառավարության աշխատակազմի ղեկավար-նախարար էիք, տեղյակ եղե՞լ եք, ի՞նչ փաստաթղթի մասին է խոսքը, որից կարելի է եզրակացնել, որ Հայաստանում պետական ինստիտուտները կաթվածահար վիճակում են, եւ մեր երկիրն էլ ձախողված է: Դավիթ Հարությունյանը պատասխանեց. «Ճիշտն ասած ինձ բացարձակապես ծանոթ չէր իր ասած բովանդակությունը, ես ուրախ կլինեի տեսնելու բուն փաստաթուղթը: Ես չեմ կարծում, որ այնտեղ որեւէ գաղտնի բան կա»:
Այն, որ Նիկոլ Փաշինյանն անգամ փաստաթղթի անունը չի ասում, որ պարզ լինի՝ ո՞ր փաստաթղթի մասին է խոսքը, Դավիթ Հարությունյանն ասաց. «Ընդհանրապես գաղտնի փաստաթղթերի ցանկը շատ հստակ է, հակառակ պարագայում ցանկացած փաստաթղթի մասին կարելի է ասել՝ գիտեք, շատ գաղտնի է: Մենք դրա հետ կապված ունենք հստակ կարգավորումներ՝ որոնք են գաղտնի փաստաթղթերը, եւ եթե դա այդքան հույժ գաղտնի փաստաթուղթ է, առնվազն պետք է հղում արվի օրենսդրությանը, թե որ կետի հիման վրա կամ կառավարության ո՞ր որոշմամբ է սահմանված, որ սա գաղտնի փաստաթուղթ է: Այդ մասին մենք ունենք շատ հստակ կարգավորումներ»:
Մենք ճշտեցինք՝ այնուամենայնիվ Նիկոլ Փաշինյանը գաղտնազերծեց որոշ բաներ այդ փաստաթղթից, որ մեր երկիրը ինստիտուցիոնալ կաթվածահար վիճակում է եւ պետական ինստիտուտները կաթվածահար են, ձեզ ծանոթ չէ՞ այդպիսի փաստաթուղթ, որը ձեր իշխանության ժամանակ կազմվել է՝ Դավիթ Հարությունյանը պատասխանեց. «Ես համենայնդեպս չկարողացա նման փաստաթուղթ մտաբերել»:
Կարդացեք նաև
Հարցին՝ ձեր կառավարությունը երկրում տիրող իրավիճակի մասին փաստաթղթեր կազմե՞լ է՝ Դավիթ Հարությունյանը պատասխանեց, որ չի կարող մեկնաբանել, քանի որ գաղափար անգամ չունի, թե ինչ փաստաթղթի մասին կարող էր խոսքը լինել: Դավիթ Հարությունյանը հորդորեց, որ վարչապետը հրապարակի փաստաթղթի անունը:
Մեր հարցին՝ ձեր գնահատմամբ, ձեր իշխանության տարիներին՝ 2014-ին երկրում այդքան մտահոգիչ իրավիճակ եղե՞լ է, այն աստիճան, որ երկիրը որակվի ձախողված, կաթվածահար պետական ինստիտուտներով, Դավիթ Հարությունյանը պատասխանեց, որ այդ գնահատականը չի համապատասխանում իրականությանը:
Ի դեպ, Սահմանադրական դատարանը պետական եւ ծառայողական գաղտնիքի մասին որոշում ունի հրապարակած, թե փաստաթղթի որ մասը կարելի է հանրայնացնել, որը՝ ոչ: Այս մասին մանրամասները եւ վարչապետի մամուլի խոսնակ Վլադիմիր Կարապետյանի արձագանքը՝ հաջորդիվ:
Հռիփսիմե ՋԵԲԵՋՅԱՆ
