Սիրելի՛ Արամ,
«Առավոտ» օրաթերթի հարգարժան խմբագրակազմ,
Շնորհավորում եմ բոլորիդ օրաթերթի հիմնադրման 25-ամյակի առթիվ:
Հեռավոր 1994-ին նորանկախ Հայաստանի տպագիր մամուլի ընտանիքում հայտնվեց ուրույն ասելիքով մի պարբերական, որը հետագայում կուսակցական ու պետական մամուլի մեջ ստանձնեց հավասարակշռողի դժվարին դերը: Լրատվական դաշտն արդեն իսկ ուներ իր փորձառու եւ ասելիք ունեցող ներկայացուցիչները, սակայն «Առավոտը» հաջողությամբ գտավ իր հաստատուն տեղը:
Կարդացեք նաև
Ընթերցողն ընդունեց նրան, ընդունեց երեկ, ընդունում է այսօր, ավելին՝ սպասում է նրան: Եվ դա բնական է, քանզի «Առավոտը» կարողացել է ապացուցել, որ հնարավոր է քննադատել առանց չարության եւ գովաբանել առանց քծնելու, հնարավոր է հասկանալ եւ հասկացնել:
Մեր հասարակությունն արժանի է ունենալու պրոֆեսիոնալ, վստահելի եւ համազգային շահերով առաջնորդվող գրավոր մամուլ: «Առավոտն» այդպիսիների առաջին շարքում է:
Շնորհավոր տոնդ, «Առավոտ»:
Բարի եւ անդավաճան ընթացք հետագա լրատվական ու ստեղծագործական գործունեության ճանապարհին:
Հարգանքով՝
ԱՐՄԵՆ ՍԱՐԳՍՅԱՆ
