Այս պահին Եռաբլուր-պանթեոնում ՀՅԴ երիտասարդները մոմավառություն են իրականացնում: Միջոցառման ընթացքում եկեղեցու այրերը աղոթք կարդացին՝ նշելով, որ այդ տղաները ոսկուց էլ թանկ են եւ, որեւէ մեկը չի կարող նրանց հիշատակը, առավել եւս շիրիմները պղծել: Երիտասարդ ՀՅԴ-ականների այս նախաձեռնությունը պայմանավորված է այսօր պանթեոնում տեղի ունեցած միջադեպով: Առավոտյան քաղաքացիներից մեկը հայտնաբերել էր,որ ապրիլյան քառօրյայի շիրիմներին սեւ ներկանյութի նման հեղուկ է քսված: ՀՅԴ երիտասարդները նաեւ պատրաստակամություն են հայտնել Եռաբլուրում շուրջօրյա հսկողություն իրականացնել:
Դեպքի առիթով, ինչպես ավելի վաղ Aravot.am-ի հետ զրույցում ասել էր պաշտպանության նախարարի մամուլի քարտուղար Արծրուն Հովհաննիսյանը, Ռազմական ոստիկանությունում նյութեր են նախապատրաստվում:
Ի դեպ, ոստիկանության պետ Վալերիյ Օսիպյանը նույնպես հանձնարարել էր ուսումնասիրել Եռաբլուրում տեղի ունեցածը: Ավելի ուշ ոստիկանները հաղորդագրություն տարածեցին, որում հայտնվում էր, որ շիրմաքարերի պղծման կասկածանքով 51-ամյա կին է ձերբակալվել:
Կեսօրից հետո, սակայն, զոհվածների հարազատների եւ այլ քաղաքացիների ուժերով շիրիմներն արդեն մաքրվել էին: Ի դեպ, Եռաբլուր-պանթեոնում գործում է պահակային ծառայություն, որը վարձատրվում է պաշտպանության նախարարությունից: Պահակներից որեւէ մեկը չի նկատել, թե ինչպես են անհայտ անձիք պղծում զոհվածների շիրիմները:
Կարդացեք նաև
Լուսինե ԲՈՒԴԱՂՅԱՆ
