Ադրբեջանի ԱԳՆ-ն հայ-ադրբեջանական սահմանին լարվածության ողջ պատասխանատվությունը դրել է Հայաստանի վրա, միաժամանակ նշելով, որ քանի դեռ «ադրբեջանական հողերն ազատագրված չեն», նման միջադեպերի հավանականությունը բարձր է:
Ադրբեջանի ԱԳՆ մամուլի քարտուղար Լեյլա Աբդուլլաևան, մասնավորապես նշել է, որ այդ հարցում այլ մեղավորներ փնտրելը ոչ այլ ինչ է, քան ինքնախաբեություն:
«Քանի դեռ Հայաստանի զինված ուժերը ներկա են Ադրբեջանի՝ միջազգայնորեն ճանաչված տարածքներում, ցավոք, նման միջադեպերի հավանականությունը շատ բարձր է: Նման դեպքերը կանխելու միակ ճանապարհն է ապահովել Հայաստանի զինված ուժերի դուրսբերումը Ադրբեջանի տարածքներից»,- ասել է Աբդուլլաևան:
Հիշեցնենք, հուլիսի 27-ին և 28-ին ՀՀ պետական սահմանի հյուսիս-արևելյան հատվածում Ադրբեջանի զինված ուժերի դիպուկահարների գործողությունների հետևանքով սպանվել է ՀՀ Զինված ուժերի զինծառայող Արման Բուլղադարյանը և վիրավորվել է ևս երկու զինծառայող:
Կարդացեք նաև
Այդ կապակցությամբ հայտարարություն է տարածել Հայաստանի ԱԳՆ մամուլի խոսնակ Աննա Նաղդալյանը՝ կատարվածի ողջ պատասխանատվությունը դնելով ադրբեջանական կողմի վրա:
Պատրաստեց՝ Վիկտորյա ԱՆԴՐԵԱՍՅԱՆԸ
