Հյուսիսային պողոտայում այսօր «Հաց բերող» անունով հայտնի Արթուր Սարգսյանի հիշատակին նվիրված միջոցառում էր՝ կազմակերպված «Սասնա ծռեր» համահայկական կուսակցության կողմից: Հիշեցնենք, որ 2016թ.-ի հուլիսի 26-ին Արթուր Սարգսյանն իր մեքենայով անցել էր ոստիկանական պատնեշը եւ սնունդ հասցրել ՊՊԾ գունդը զավթած «Սասնա ծռեր» զինված խմբին: Կուսակցության վարչության անդամ Վարուժան Ավետիսյանը լրագրողների հետ զրույցում Արթուր Սարգսյանին մարդասիրության եւ անձնազոհության խորհրդանիշ որակեց. «Պիտի սովորենք Արթուրից եւ շարունակենք մեր հայրենիքն ազատագրել, հզորացնել, արժանապատիվ կյանքի հասնել»:
Անդրադառնալով Արթուր Սարգսյանին մեղադրանք առաջադրելու եւ կալանավորելու փաստին՝ Վարուժան Ավետիսյանը նշեց. «Նրան բանտարկել էին վրեժխնդրությունից դրդված: Նրա հիվանդությունները համատեղելի չէին կալանքի հետ: Այդ ամենին մասնակցեցին պաշտոնյաներ, որոնք այսօր էլ պաշտոնյա են՝ գլխավոր դատախազ, ՀՔԾ պետ, քննչական խմբի ղեկավար, դատավորներ…Ցավոք, այդ ամենին գնահատական չտրվեց: Ակնհայտ է, որ այսօրվա իշխանությունը խոնարհվում է Արթուրի արարքի եւ հերոսականության առաջ, բայց մատը մատին չի տալիս, մի բան էլ՝ պարգեւատրում է այդ մարդկանց, որոնք, փաստորեն, Արթուրի դահիճներն են եղել: Համոզված ենք, որ այդ վիճակն էլ կհաղթահարվի, եւ բոլորը պատասխան կտան»:
Լուիզա ՍՈՒՔԻԱՍՅԱՆ
