Արարատի մարզի մի քանի համայնքում մոտ մեկ ամիս է, ինչ արագիլներն աղտոտված են: Բնապահպաններն ահազանգում են, որ թռչունների փետուրները սեւացած են եւ կպչուն, ինչի հետեւանքով նրանք չեն կարողանում թռնել, կերակուր հայթայթել: Կամավորները եւ պատկան մարմինները վերջին օրերին մաքրում են արագիլներին եւ տեղում ուսումնասիրություններ անում: «Ոչ մի լավ բան ասել այս պահին չեմ կարող՝ չնայած նրան, որ շատ հ/կ-ներ եւ կենդանասերներ արագիլներին բռնում են, մաքրում եւ բաց թողնում»,-Aravot.am-ի «ԿԵՆԴԱՆԱՊԱՏՈՒՄ» նախագծի հետ զրույցում իրավիճակին այսպիսի գնահատական տվեց բնապահպան, «Սիվիլ Վոյս» կազմակերպության փորձագետ Սիլվա Ադամյանը:
Նրա խոսքով՝ խնդիրն այն է, որ դեռ չի հայտնաբերվել յուղային շերտի գոյացման աղբյուրը. «Դեռ չենք կարող խոսել վտանգի չեզոքացման մասին: Վտանգը տեւական կլինի, եթե յուղային շերտը չվերանա: Մոտ 15 արագիլ է մաքրվել. նրանք դեռ մաքուր են եւ լավ վիճակում, բայց չէ՞ որ սնվում են նույն՝ աղտոտված ջրանցքից ու պատվում այդ նյութերով»: Սիլվա ադամյանի փոխանցմամբ՝ դեռեւս հուլիսի 15-ին «Սիվիլ վոյս»-ը 2-3 արագիլի անկման մասին ահազանգ ստացավ Հովտաշատի բնակչից, բայց թռչունների մարմինները չգտան. «Ասացին, որ շներն են տարել: Ուսումնասիրություն չկա անկման ամբողջական տվյալների մասին»:
Կարդացեք նաև
Սիլվա Ադամյանը շեշտեց, որ 2017թ.-ին Արարատում եւս հայտնաբերվել են արագիլների աղտոտված մարմիններ, եւ պատճառը կրկին յուղային արտահոսքն է եղել. «Այն ժամանակ էլ չկարողացանք հայտնաբերել, թե ինչպես է այդ նյութը հայտնվել ջրում: Ես համամիտ չեմ գնահատականների հետ, թե դա կենդանական ծագման յուղաշերտ է, կարծում եմ՝ դա այլ թափոն է, որը Հրազդան գետով հասնում է ջրանցքին եւ վնասում կենդանիներին»:
Կառավարությանը ենթակա Բնապահպանության եւ ընդերքի տեսչական մարմնի իրազեկման եւ հանրության հետ տարվող աշխատանքների բաժնի պետ Նաիրա Աղաբաբյանը «ԿԵՆԴԱՆԱՊԱՏՈՒՄ»-ին փոխանցեց՝ Արարատի մարզի համայնքների հարակից ջրային տարածքներից ջրի փորձանմուշներ են վերցվել, կատարվում են լաբորատոր ուսումնասիրություններ՝ պատճառները պարզաբանելու, խնդիրը կանխելու եւ մեղավորներին պատասխանատվության ենթարկելու նպատակով: «Այդ տարածքներում գործող տնտեսվարողների մոտ փորձում ենք հայտնաբերել աղտոտվածության աղբյուրը»,-եզրափակեց Նաիրա Աղաբաբյանը:
Լուիզա ՍՈՒՔԻԱՍՅԱՆ
Լուսանկարները՝ թռչնաբան Մամիկոն Ղասաբյանի
Տեսանյութը՝ «Սիվիլ վոյս»-ի
