Պորտուգալիայի մինչեւ 19 տարեկանների հավաքականի գլխավոր մարզիչ Ֆիլիպե Ռամոսը վաղը Վազգեն Սարգսյանի անվան «Հանրապետական» մարզադաշտում Իսպանիայի հետ կայանալիք Եվրոպայի առաջնության եզրափակիչ հանդիպման նախօրեին լրագրողների հետ հանդիպմանն ասաց. «Բարդ հանդիպում է սպասվում: Խմբային փուլում Իսպանիայի հետ արդեն հանդիպել ենք եւ ծանոթ ենք վաղվա մեր մրցակցին: Թեեւ այս թիմում չկան այն ֆուտբոլիստները, որոնք հաղթել են նախորդ առաջնությունը, կենտրոնացած ենք լինելու եւ փորձելու ենք անել ամեն ինչ հաղթանակի հասնելու համար: Պորտուգալիայի համար եզրափակիչ անցնելն ավելի հեշտ ստացվեց: Մենք խմբում 1-ին տեղը գրավեցինք ու կիսաեզրափակչում համեմատաբար հեշտ մրցակցի հանդիպեցինք: Բայց Իռլանդիայի հետ խաղը հեշտ չտրվեց:
Ինչ եղել է՝ անցյալում է արդեն: Հիմա կենտրոնացած ենք վաղվա հանդիպման վրա: Իսպանիան հարձակողական ֆուտբոլ է խաղում եւ փորձելու է նախաձեռնությունը վերցնել: Տղամարդկանց խաղ է սպասվում, որում փորձելու ենք հաջողության հասնել: Կցանկանայինք, որպեսզի բանը հետխաղային 11 մետրանոցներին չհասներ: Կգերադասեինք հաղթել 90 րոպեում: Բայց եթե պետք է չեմպիոն դառնանք 11 մետրանոցներով, դրան էլ ենք համաձայն: Ուզում ենք կրկնել 2018 թվականի արդյունքը»:
Աշոտ ՀԱԿՈԲՅԱՆ
