«Արտագաղթը երեւի սպառնալիքներից մեկն է, որը բացասաբար է ազդում մեր անվտանգության միջավայրի վրա, ամենաուղղակի ազդեցությունը բանակի վրա է»,- այսօր այս մասին լրագրողների հետ հանդիպմանն ասաց անվտանգության խորհրդի քարտուղար Արմեն Գրիգորյանը: Նա վստահեցրեց.«Մենք փորձում ենք հասկանալ, թե որոնք են այն ճանապարհները, որոնցով կկարողանանք լուծել խնդիրը: Այս հարցի լուծումը բազմաշերտ է եւ մեկ գործոնով լուծելու հնարավորություն չկա: Բազմաթիվ քննարկումներ են տեղի ունեցել վարչապետի գլխավորությամբ եւ տարբեր այլ մակարդակներով՝ թե ինչպես կարող ենք լուծել խնդիրը՝արտագաղթի նվազեցումը, սրա հետ մեկտեղ կա այլ խնդիր՝ ծնելիությունը, ծնելիության թիվը մեծացնենք: Քաղաքականություն ենք մշակում, որ կամ լուծենք կամ նվազագույնի հասցնենք արտագաղթը»:
Գրիգորյանը նշեց՝ 2018-ի վերջին Հայաստանից մեկնողների եւ Հայաստան ժամանողների ցուցանիշում դրական սալդո է գրանցվել, բայց ասել, որ ներգաղթ է եղել՝ դեռ վաղ է: Գրիգորյանն ասաց, որ անհրաժեշտություն կա ուսումնասիրել եւ հասկանալ՝ այդ մարդիկ որպես զբոսաշրջի՞կ են եկել, թե՞ հաստատվելու: Ախ քարտուղարն ասաց, որ Հայաստանի անձնագիր ստանալու համար դիմողների թիվը մեծ է, բայց սա չի նշանակում ներգաղթ.«Մենք գնալու ենք նրան, որպեսզի արտագաղթը հասցնենք գոնե զրոյի, այնուհետեւ հասնենք դրական տեղաշարժին»:
Նելլի ԲԱԲԱՅԱՆ
