Անվտանգության խորհրդի քարտուղար Արմեն Գրիգորյանն այսօր լրագրողների հետ հանդիպմանն ասաց, որ մշակելու են ազգային անվտանգության նոր ռազմավարություն եւ պատրաստ են ամենայն պատասխանատվությամբ ստանձնել ռազմավարության մշակման միջգերատեսչական հանձնախմբի գործառույթները:
Գրիգորյանն ասաց, որ փաստաթղթի մշակման համար արդեն հսկայական աշխատանք է կատարվել։
Թե ինչու են որոշել նոր ռազմավարություն մշակել, ԱԽ քարտուղարը մի շարք պատճառներ նշեց. «Գործող ռազմավարությունն ընդունվել է 12 տարի առաջ, որից հետո Հայաստանում, տարածաշրջանում եւ աշխարհում հիմնարար փոփոխություններ են տեղի ունեցել: 2007 թվականից ի վեր Ռուսաստան-Արեւմուտք հարաբերություններում զարգացման նոր միտումներ են արձանագրվել, տեղի է ունեցել ռուս-վրացական պատերազմը՝ սրելով այդ երկրների միջեւ հարաբերությունները: Իրան-ԱՄՆ լարված հարաբերություններով պայմանավորված՝ մեր սահմանակից Իրանի համար առաջադրվել են պատժամիջոցները հաղթահարելու նոր խնդիրներ: Մերձավոր արեւելյան տարածաշրջանին վերաբերող հիմնահարցերը ենթարկվել են էական փոփոխությունների: Մեզ համար լրջագույն խնդիր է բացառել դեռեւս հարկ եղած գնահատականների չարժանացած 2016 թվականին ապրիլյան իրադարձությունների կրկնությունը:Մեծ փոփոխությունների է ենթարկվել Հայաստանի տնտեսական ինտեգրման քաղաքականությունը»:
Գրիգորյանը նշեց նաեւ ԵԱՏՄ-ին Հայաստանի անդամակցումը, ԵՄ-ի հետ ստորագրած համապարփակ եւ ընդլայնված գործընկերության համաձայնագիրը.«Այս գործընթացների հետ մեկտեղ կան իրողություններ, որոնք շարունակում են մնալ անփոփոխ: Մասնավորապես Հայաստանի գլխավոր մարտահրավերը շարունակում են մնալ արցախյան հիմնահարցի շուրջ առկա գործընթացները՝ փոխզիջումների ճանապարհով հիմնահարցը լուծելու վերաբերյալ Ադրբեջանի մերժողական քաղաքականության պատճառով: Շարունակում է փակ մնալ նաեւ հայ-թուրքական սահմանը: Այս եւ այլ իրողությունները հաշվի առնելով՝ մշակվելու է ազգային անվտանգության նոր ռազմավարություն, որի իրականացման հենասյունն է լինելու ՀՀ-ի զինված ուժերը, որոնց կատարելագործման եւ մարտունակության բարձրացման համար բազմակողմանի եւ բազմաշերտ քննարկումներ են ընթանում: Անհրաժեշտություն ենք տեսնում ընդլայնելու անվտանգության հայեցակարգը, որն իր մեջ պետք է ներառի կառավարման համակարգի արդյունավետությունը եւ ռազմավարական ենթակառուցվածքների զարգացումը: Մենք համոզված ենք, որ մեր հզորությունը գալիս է մեր դավանած գաղափարներից, երկրի առաջնորդներից ու երկրի հեղինակությունից»:
Կարդացեք նաև
Գրիգորյանն ընդգծեց.«Փափուկ ուժը մեր անվտանգության բաղադրիչն է»:
Ախ քարտուղարի խոսքով՝ անհերքելի է, որ Հայաստանի, Արցախի ու Սփյուռքի անվտանգության հարցերը փոխկապակցված են։
Գրիգորյանի ներկայացմամբ՝ անհրաժեշտ է ձեւավորել փաստաթուղթ, ոը կլինի ճկուն, կարձագանքի մեր երկրում, տարածաշրջանում եւ աշխարհում տեղի ունեցող փոփոխություններին եւ զարգացումներին: Ըստ նրա՝ ռազմավարությունը, դասական իմաստով, պետակաշինության ճանապարհային քարտեզն է՝ ուղղված երկրի քաղաքական նպատակներին եւ երազանքներին հասնելուն:
Գրիգորյանը մեջբերեց չինացի ստրատեգ Սուն Ցզիին.«Եթե շահ չունես՝ մի՛ առաջացիր, եթե չես կարող ձեռք բերել, ապա զորքերը գորոծողության մեջ մի՛ մտցրու, եթե վտանգ չկա՝ մի՛ պատերազմիր: Սրանք դարերի փորձություն անցած մոտեցումներ են, որոնք այսօր էլ արդիական են»:
Ամփոփելով իր ելույթը, Գրիգորյանը մեջբերեց նաեւ վարչապետ Փաշինյանին, որը հղում անելով չինական ռազմական մտքին, ասել էր՝.«Տաղանդավոր գեներալները հաղթում են առանց պատերազմի»: Եվ սա, ինչպես Գրիգորյանն ասաց, մեր ռազմական տեսլականն է:
Նելլի ԲԱԲԱՅԱՆ
Հայաստանի Հանրապետության անվտանգության հիմնական բաղադրիչներն են ժողովրդի միասնությունը, հզոր բանակը և ճշգրիտ դիվանագիտությունը՝ յուրաքանչյուրն իր բազմաթիվ ենթաբաղադրիչներով