Ուկրաինայի անվտանգության ծառայությունը Օդեսայի շրջանի Իզմայիլ նավահանգստում կալանել է ռուսական Neyma լցանավը, հաղորդում է BBC-ն:
Կալանված լցանավում խուզարկություն է կատարվել, առգրավվել են փաստաթղթեր, անձնակազմը հարցաքննվել է: Լցանավում եղել է անձնակամի 10 անդամ:
Լցանավը կալանվել է ուկրաինական ռազմանավերն արգելափակելու համար: Ուկրաինայի անվտանգության ծառայությունը կարծում է, որ Ռուսաստանի սահմանային ծառայության ներկայացուցիչները Դաշնային անվտանգության ծառայության ուղղակի հրահանգով «ռազմական ագրեսիայի գործողություն են իրականացրել» ուկրաինական ռազմանավերի դեմ Կերչի նեղուցում: Ուկրաինայի անվտանգության ծառայությունից հայտարարել են, որ ուկրաինական նավերն արգելափակվել են անօրինական կերպով, զենքի կիրառմամբ և Neyma լցանավի օգնությամբ:
Ուկրաինացի սահմանապահների տեղեկությամբ՝ ռուսական դրոշով լցանավը մտել է Իզմայիլ նավահանգիստ Nika Spirit անվան տակ և նույնականացվել որպես հայտնի Neyma լցանավ, որն ավելի վաղ օգտագործվել էր Կերչի նեղուցն անցնելու համար:
Կարդացեք նաև
Ուկրաինայի անվտանգության ծառայությունում կարծում են, որ լցանավի անունը դիտավորյալ է փոխվել՝ «նպատակ ունենալով կոծկել մասնակցությունն անօրինական գործողություններին և ագրեսիային»: Խոսքը անցյալ տարվա նոյեմբերին Կերչի նեղուցում ուկրաինական նավերի կալանման մասին է:
Ռուսաստանի ԱԳՆ-ից հայտարարել են, որ ռուսական կողմը պարզում է կատարվածի հանգամանքները՝ համապատասխան քայլեր ձեռնարկելու համար:
«Եթե խոսքը ռուսներին պատանդ վերցնելու մասին է, դա կորակվի որպես միջազգային իրավունքի կոպտագույն խախտում և հետևանքներն իրենց սպասել չեն տա»,- ասել են նախարարությունում:
Ավելի ուշ փոխարտգործնախարար Գրիգորի Կարասինը հայտարարել է, որ լցանավի կալանումը «շատ վատ նորություն է»:
«Կիևում ինչ-որ մեկը ցանկանում է նոյեմբերի 25-ի սեփական սադրանքի կոշտ շարունակությունը: Մենք կատարվածը հանգամանորեն կուսումնասիրենք»,- ասել է Կարասինը:
Պատրաստեց Վիկտորյա ԱՆԴՐԵԱՍՅԱՆԸ
Заголовок измените.Где Измаил и где Керченский пролив