Aravot.am-ը Հայաստանում Ֆրանսիական համալսարանից մեկնաբանություն խնդրեց համալսարանի շրջանավարտ Վահե Թումանյանի բարձրացրած հարցի վերաբերյալ, որը վերաբերվում էր դիպլոմների շնորհման կարգին:
«Համաձայն իր կանոնադրության՝ Հայաստանում ֆրանսիական համալսարանի (ՀՖՀՀ) գործունեության նպատակն է եվրոպական և միջազգային չափանիշներին համապատասխան ֆրանսիական համալսարանների ու ֆրանսիական «Բարձրագույն դպրոցների» մոդելի հիման վրա Հայաստանում իրականացնել բարձրագույն կրթական ծրագրեր` տրամադրելով համալսարանական դիպլոմներ, որոնք ճանաչվում են եւ Հայաստանում, եւ Ֆրանսիայում: Համալսարանն, այսպիսով, ուսանողներին հնարավորություն է տալիս ստանալու երկու զուգահեռ դիպլոմներ՝ համաձայն դիպլոմների շնորհման տրանսազգային ընթացակարգի, որը հանգեցնում է դիպլոմների անբաժանելիության:
Համաձայն ֆրանսիական հավատարմագրման պայմանների ՀՖՀՀ կրթական ծրագրերը, ուսումնական պլանները, կրեդիտները, դասավանդման, ուսումնառության և գնահատման կարգը համապատասխանում են ֆրանսիական դիպլոմների չափանիշներին և սահմանված են համալսարանի ուսումնական ու քննական գործընթացի կազմակերպման կարգում, որն հաստատվում է հոգաբարձուների խորհրդի կողմից: Այս հիմքով Հայաստանում ֆրանսիական համալսարանը լիազորված է շնորհելու ֆրանսիական և հայկական դիպլոմներ՝ ապահովելով Հայաստանում ֆրանսիական բարձրագույն կրթական ծրագրերի ճանաչումը:
Ներկայումս ՀՖՀՀ-ն չի շնորհում զուտ հայկական դիպլոմներ, որոնց պարագայում դիպլոմների տրամադրումը և գերազանցության շեմի սահմանումը կենթարկվեր հայկական օրենսդրությանը, այսինքն՝ համաձայն բարձրագույն կրթության հայկական ծրագրերի և առանց զուգահեռ ֆրանսիական դիպլոմի առկայության:
Կարդացեք նաև
Ինչպես վերջերս ՈՒՖԱՌ շրջանավարտների ասոցիացիան հիշեցրել է տարածած հայտարարության մեջ, ՀՖՀՀ ավելի քան 2000 շրջաբավարտների զբաղվածության գործակիցը կազմում է շուրջ 80 %, ինչը վկայում է ստացած կրթության օրինականության, գերազանցության և հայաստանյան աշխատաշուկայի կարիքներին համապատասխանության մասին :Այս առումով ՀՖՀՀ արձանագրում է շրջանավարտների կողմից հայաստանյան աշխատաշուկայում աշխատանք փնտրելու, Հայաստանում կամ արտասահմանում ուսումնառությւոնը շարունակելու որևէ դժվարության բացակության մասին»,-Aravot.am-ին պատասխանեցին համալսարանի տնօրինությունից:
Գոհար ՀԱԿՈԲՅԱՆ
Լուսանկարը` Վիքիպեդիայից
