Ոստիկանությունը հեղափոխությունից հետո պարբերաբար քրեական հեղինակություններին բերման է ենթարկում, բայց, ըստ էության, դատելով իրավիճակից, ոստիկանությունը իրավիճակին չի տիրապետում, որովհետեւ մենք օրենքով գողի սպանության ականատես եղանք, բայց մինչ այժմ սպանություն կատարողի, պատվիրատուների մասին որեւէ բան չի հրապարակվում: Այսօր լրագրողներն այս հարցն ուղղեցին ՀՀ ոստիկանապետ Վալերիյ Օսիպյանին, որը ասուլիս էր հրավիրել: Խոսքը մասնավորապես մասիվցի Անդիկի սպանության մասին է: Օսիպյանը նախ ասաց, որ համակարծիք չէ, թե ոստիկանությունը չի տիրապետում իրավիճակին. «Անգամ թվային տվյալներով պատկեր ներկայացրեցինք, որտեղ հաջողություններ ունենք: Լիարժեք տիրապետում է ոստիկանությունը: Բոլոր ոստիկանապետերի ժամանակ էլ եղել են նման դեպքեր եւ բոլոր իշխանությունների ժամանակ էլ եղել են: Հնարավոր չի հասարակությունից, մեր առօրյայից հանցագործությունները վերանան: Ինչ վերաբերում է կոնկրետ մատնանշած դեպքին, շուտով մենք հանրությանը կներկայացնենք այս դեպքի հետ կապված մեր բոլոր հաջողությունները: Դա չի նշանակում, որ ոստիկանությունը լռում է: Ոստիկանությունը լռում է՝ ելնելով իրավիճակից: Հանցագործության դեպքեր եւ տեսակներ կան, որոնք պահանջում են բացահայտման համար ժամանակ: Կոնկրետ երեկ մենք բացահայտել ենք բնակարանային գողության դեպք, որը կատարվել է 1997 թվականին, պատկերացնո՞ւմ եք: Յուրաքանչյուր դեպք ունի իր հասունացման շրջանը, իր բացահայտման պահը»:
Թե ինչու են բերման ենթարկում քրեական հեղինակություններին՝ Օսիպյանը պատասխանեց, որ ոստիկանությունը կանխարգելիչ աշխատանք է տանում, դա իր գործառույթն է:
Հարցին՝ չնայած փակագծերը չեք բացում, բայց կա՞ վարկած, թե ինչի՞ հիման վրա են սպանել մասիվցի Անդիկին, Օսիպյանը պատասխանեց. «Սպանությունը պատվիրված է, ունենք կատարող եւ պատվիրատու»:
Հռիփսիմե ՋԵԲԵՋՅԱՆ
