Վերաքննիչ քրեական դատարանում դատավոր Արսեն Նիկողոսյանի նախագահությամբ այսօր սկսվեց Մարտի մեկի գործով մեղադրյալ, ՀՀ երկրորդ նախագահ Ռոբերտ Քոչարյանի գույքի վրա դրված կալանքի վերաբերյալ դատավոր Աննա Դանիբեկյանի կայացրած որոշման դեմ դատախազության բողոքի քննությունը: Հիշեցնենք, որ 2018 թվականի հուլիսի 30-ին՝ Քոչարյանին մեղադրանք առաջադրելուց 4 օր անց, կալանք էր դրվել նրա ինչպես գույքի, այնպես էլ բանկային հաշիվների վրա: Հունիսի 7-ին Երևանի ընդհանուր իրավասության դատարանը՝ նախագահությամբ դատավոր Աննա Դանիբեկյանի, մասնակի բավարարել էր պաշտպան Հովհաննես Խուդոյանի ներկայացրած բողոքը՝ արձանագրելով Ռոբերտ Քոչարյանի իրավունքների խախտումը: Դատախազությունն էլ վերաքննիչ բողոք է հղել այդ որոշման դեմ:
Ներկայացնելով բողոքը՝ այս գործով մեղադրող-դատախազ Վահե Դոլմազյանը նշեց, որ գույքի վրա կալանք դնելու նախաքննական մարմնի որոշումը պայմանավորված է եղել բացառապես արդարադատության շահի գերակայությամբ եւ ունեցել է դատավարական հիմքեր եւ անհրաժեշտություններ, մասնավորապես՝ դատական ծախսերի փոխհատուցում: Դոլմազյանը շեշտեց, որ քննիչի տրամադրության տակ հստակ եւ ամբողջական տեղեկություններ չեն եղել Քոչարյանի անվամբ գրանցված գույքի եւ դրամական միջոցների վերաբերյալ. «Ինչ վերաբերում է Ռոբերտ Քոչարյանի աշխատասենյակից խուզարկությամբ առգրավված գումարին եւ զենքերին, նույնականացման քարտերին, ապա դրանց վերաբերյալ առաջին ատյանի դատարանի գնահատականները հիմնավոր չեն: Մյուս կողմից, Ռոբերտ Քոչարյանին առաջադրված մյուս՝ կաշառքի մասով մեղադրանքը ենթադրում է գույքի բռնագրավում: Գտնում ենք, որ առաջին ատյանի դատարանի որոշումը հիմնավոր չէ: Պահանջում ենք բեկանել այն»:
Գործով մյուս մեղադրող-դատախազ Պետրոս Պետրոսյանն էլ նշեց, որ Ռոբերտ Քոչարյանի գույքի վրա կալանք է դրվել՝ հաշվի առնելով հնարավոր քաղաքացիական հայցը եւ դատական ծախսը. «Բացի այդ, կան ողջամիտ կասկածներ, որ այդ գույքը կարող է օտարվել կասկածելի ճանապարհներով»: Դատախազության բողոքի քննությունը շարունակվում է:
Լուիզա ՍՈՒՔԻԱՍՅԱՆ
Կարդացեք նաև
