Արդեն երրորդ օրն է, որ «Արմավիր» ՔԿՀ-ում իրենց պատիժը կրող Իրանի Իսլամական Հանրապետության 20 դատապարտյալ եւ կալանավորված անձ հացադուլի մեջ են։
Ինչպես մեզ տեղեկացրին նրանց հարազատները, երեկ հացադուլավորների հետ հանդիպել են Հայաստանում՝ ԻԻՀ-ի դեսպանատան պատասխանատուները։ Վերջիններս հորդորել են դադարեցնել հացադուլը եւ ժամանակ տալ, որպեսզի բարձրացված հարցերը քննարկեն պատկան մարմինների հետ։
Հիշեցնենք, որ հացադուլավորները պահանջում են՝ իրենց արտահանձնել Իրանին, միաժամանակ դժգոհ են, որ իրենց քրեական գործերը անհարկի ձգձգվում են քննչական կոմիտեի բաժանմունքներում։
Աշխատակիցների հորդորից հետո հացադուլը դադարեցրել է 2 դատապարտյալ, 18 հոգի շարունակում է հացադուլը։ Միաժամանակ նրանք դիմումներ են ուղարկել ՀՀ վարչապետ Նիկոլ Փաշինյանին, արդարադատության նախարար Ռուստամ Բադասյանին եւ գլխավոր դատախազ Արթուր Դավթյանին։ Հացադուլավորները պաշտոնյաներին խնդրում են հանդիպել իրենց, տեղում հարցերը քննարկելու համար, իսկ հակառակ դեպքում կդիմեն նաեւ ջրադուլի։
Կարդացեք նաև
Ի դեպ, հացադուլի մասին դատապարտյալների հարազատները տեղեկացրել են նաեւ Մարդու իրավունքների պաշտպան Արման Թաթոյանին։
Դավիթ ԱՐՄԵՆՅԱՆ
