Ինչպես տեղեկացրել ենք, այսօր Երեւանի ընդհանուր իրավասության դատարանի Կենտրոն նստավայրում ԱԺ նախկին պատգամավոր Մանվել Գրիգորյանի եւ նրա կնոջ՝ Նազիկ Ամիրյանի գործով դատական նիստին դատավորը երկու ժամ ժամանակ տվեց, որ Մանվել Գրիգորյանին հետազոտած բժիշկն իր աշխատանքային ստաժի մասին հավաստող փաստաթղթերը ներկայացնի դատարան:
Հիշեցնենք, որ Մանվել Գրիգորյանը այսօր էլ չէր եկել նիստին, իսկ նրան հետազոտելու համար փորձագետներ էին հրավիրվել: Երկու ժամը լրացավ, բժշկուհին՝ Լուսինե Մամիկոնյանը չեկավ:
Դատավոր Մնացական Մարտիրոսյանն ասաց՝ քանի որ ողջամիտ ժամկետում պիտի դատարանը գործը քննի, չի կարող անընդհատ նիստը հետաձգել: Նա կարդաց դատարանին հասցեագրված, դատաբժշկական գիտագործնական կենտրոնից ուղարկված գրությունը եւ ասաց. «Փաստորեն, Մանվել Գրիգորյանին փորձաքննող հանձնաժողովի կազմում ընդգրկվել են անձինք, որոնք այդ փորձագիտական հիմնարկի կազմից չեն: Այսինքն, Դատապարտյալների հիվանդանոց ՔԿՀ-ի բժիշկ Հեքիմյանն օրինակ, այդ կազմից չէ, նաեւ ոստիկանության բժշկական վարչության պետի տեղակալը: Խնդրում են այդ անձանց եւս հրավիրել դատարան ու քննարկել նրանց փորձագետ նշանակելու հարցը»:
Դատավորը հորդորեց հաջորդ նիստին ապահովել փորձագետների մասնակցությունը՝ իրենց մասնագիտական հմտությունները հավաստող փաստաթղթերով:
Կարդացեք նաև
Պաշտպանական կողմը Մանվել Գրիգորյանի առողջական վիճակի հետ կապված փաստաթղթեր ներկայացրեց դատարան, դատավորը դրանք ուղարկեց փորձագիտական հանձնաժողով:
Հռիփսիմե ՋԵԲԵՋՅԱՆ
