ՀՀ արդարադատության նախարարության քրեակատարողական ծառայությունում շարունակվում են կադրային փոփոխությունները։ Արդարադատության նախարարի հրամանով` քրեակատարողական ծառայության պետ Արթուր Գոյունյանի տեղակալ է նշանակվել արդարադատության գնդապետ Վահե Պապոյանը, որը մինչ այդ «Երեւան Կենտրոն» ՔԿՀ-ի պետն էր։
Վահե Պապոյան
Այսօր ՔԿԾ կայքից բացակայում է նաեւ առաջին տեղակալ, տեղաբաշխման հանձնաժողովի նախագահ Մանուկ Միքայելյանի մասին տեղեկությունը։ Ըստ մեր տեղեկությունների՝ նրա փոխարեն նշանակվել է Հայաստանի ճանապարհային ոստիկանության նախկին պետ, գեներալ-մայոր Արտակ Հարությունյանը։
Դավիթ ԱՐՄԵՆՅԱՆ
Հ. Գ. Ի դեպ, ՀՀ ԱՆ քրեակատարողական ծառայության հանրային կապերի բաժինն այսօր տարածել է հետեւյալ պարզաբանումը. «ՀՀ արդարադատության նախարարության քրեակատարողական ծառայության պետ, արդարադատության գեներալ-մայոր Արթուր Գոյունյանին քրեակատարողական ծառայության պետի պաշտոնում նշանակելուց հետո զանգվածային լրատվության միջոցներում պարբերաբար շրջանառվում են տեղեկություններ այն մասին, թե իբր քրեակատարողական ծառայությունում «կադրային ջարդ» է սկսվել, և քրեակատարողական ծառայության նորանշանակ պետն ազատվում է նախկին կադրերից։
Կարդացեք նաև
Վերոնշյալի կապակցությամբ հայտնում ենք, որ քրեակատարողական ծառայությունում «կադրային ջարդ» ու «հներից ազատվելու» միտում չկա, իսկ այդ մասին լուրերը մտացածին են և իրականությանը չեն համապատասխանում։
Նշենք նաև, որ քրեակատարողական ծառայությունում, ինչպես և ցանկացած այլ մարմնում, աշխատանքներն առավել արդյունավետ կազմակերպելու նպատակով նախկինում ևս իրականացվել են զբաղեցրած պաշտոններից ազատումներ, նոր նշանակումներ, ինչպես նաև՝ փոխատեղումներ։
Միաժամանակ հավելենք, որ ներկայումս քրեակատարողական ծառայությունում իրականացվող իրավակազմակերպական բարեփոխումների համատեքստում նույնպես, որպես բնականոն գործընթաց, ապահովվելու է համակարգի կադրային ռեսուրսի համապատասխանեցումը կառավարության ոլորտային քաղաքականության հիմնական գերակա ուղղություններով ներկայացվող համապատասխան պահանջներին, որի շրջանակներում, բնականաբար, կատարվելու են կադրային տեղաշարժի վերոհիշյալ գործընթացները, ինչն իր հերթին հանդիսանում է ցանկացած պետական մարմնի գործունեության բնականոն վիճակ և միտված է լինելու համակարգը համալրել բացառապես պահանջվող մասնագիտական գիտելիքներն ու ծառայողական և աշխատանքային ունակությունները բավարարող անձանցով, ինչպես նաև կոռուպցիոն ռիսկերից ու դրսևորումներից զերծ կադրերով»:
