ՀՀ նախագահ Արմեն Սարգսյանի` Լոռի եւ Տավուշ կատարած աշխատանքային այցն ամփոփվեց Հաղարծին վանքում եւ վանքին կից կենտրոնում: Նախագահին ընդունեց Տավուշի թեմի առաջնորդ Բագրատ սրբազանը եւ հոգեւոր դասի այլ ներկայացուցիչներ: Նախագահը նշեց, որ հայրենաճանաչության իր առաջին ուսուցիչը եղել է ճարտարապետ, հին ճարտարապետության մասնագետ հայրը, իսկ առաջին այցելությունը Տավուշ եղել է 4-5 տարեկանում: Հետո էլ ուսանողական տարիներից է պարբերաբար այցելել:
Ինչ վերաբերում է Բագրատ սրբազանին, ՀՀ նախագահն ասաց, որ նա իր հին բարեկամն է, նրան ճանաչում է այն ժամանակվանից, երբ սրբազանը Մեծ Բրիտանիայում ուսանող էր: «Ինքը երիտասարդ էր, բայց ես իր մեջ միշտ տեսել եմ առաջնորդի: Վստահ էի, որ շատ մեծ գործեր է անելու, եւ այսօր իսկապես ուրախ եմ, որ այդ ամենն իրականացել է եւ Սրբազանի հետ եմ հանդիպում»,-հայտնեց նախագահը, իսկ Հաղարծինը հրաշք որակեց եւ ոչ միայն հոգեւոր կենտրոն, այլեւ մեր պետականության խորհրդանիշերից մեկը:
Արմեն Սարգսյանն ընդգծեց, որ պետականությունը ստեղծվել է ոչ թե երեկ, երեսուն տարի կամ դիցուք, հարյուրամյակներ առաջ, այլ հազար տարի առաջ մենք արդեն ուժեղ պետականություն ունեինք, եւ 10-րդ դարում կառուցում էինք հոգեւոր, մշակութային եւ կրթական կենտրոններ:
Տավուշի թեմի առաջնորդ Բագրատ սրբազանը կարեւորելով Նախագահի այցը Տավուշ, նշեց, որ պետական բարձրաստիճան այրերի յուրաքանչյուր այցելություն չափազանց ներշնչող է, որովհետեւ Տավուշ աշխարհը առանձնահատուկ դերակատարություն եւ նշանակություն ունի մեր երկրի կյանքում:
Կարդացեք նաև
Ասաց, որ Տավուշը մեր հայրենիքի դարպասն է, եւ այնտեղ ապրող թե զինվորը, թե քաղաքացիական ազգաբնակչությունը մշտապես ներշնչանքի, աջակցության մասնակցության, ներդրումի կարիքն ունեն: «Այդ կարիքը օգնություն չէ, այլ մասնակցություն է: Ես կարծում եմ, որ այս այցելությունը եւս մի նոր առիթ է մեր ժողովրդի համար` վերագնահատելու եւ հասկանալու համար, որ իրենք շատ կարեւոր են մեր պետականության ամրապնդման երաշխավորման համար»,-շեշտեց Տավուշի թեմի առաջնորդը:
Մանրամասն՝ տեսանյութում
Գոհար ՀԱԿՈԲՅԱՆ
