«Մեր բնակֆոնդն անմխիթար վիճակում է»,- Sputnik Արմենիա մուլտիմեդիոն մամուլի կենտրոնում լրագրողների հետ հանդիպմանը Երևանում գոյություն ունեցող խնդիրներից առանձնացրեց Երևանի նախկին քաղաքապետ Վահագն Խաչատրյանը:
Նա նշեց, որ սկսած այն ժամանակներից, երբ բնակֆոնդի հետ կապված փորձ արեցին՝ գազաֆիկացում, էլեկտրաֆիկացում, այդ խնդիրն առաջացավ. «Նկատի ունեմ նաև կետային քաղաքաշինական լուծումները: Բակային տարածքներ փոխանակ անեին, սկսեցին բարձրահարկեր կառուցել՝ Նալբանդյան-Թումանյան փողոցի հայտնի պատմությունը կամ Շահումյան դպրոցի բակի պատմությունը: Եվ այդ ամենի հեղինակը Նարեկ Սարգսյանն էր, որ երկար տարիներ պատասխանատու էր քաղաքաշինության և ճարտարապետության համար: Ոչ թե կողմ եմ նրան, որ մարդկանց պատժեն ու պատասխանատվության ենթարկեն, այլ որ գոնե մի կողմ քաշվեն այդ գործից: Դա է պատճառը, որ երբ այսօր մի քիչ ջերմաստիճանը բարձրանում է, առանց այդ էլ Երևանը տրանսպորտային կոլապսի մեջ է, մարդիկ չեն կարողանում գոնե երեկոյան դուրս գալ իրենց բակ, շնչել: Հիմա այս բեռը եկել, կուտակվել է այսօրվա քաղաքային իշխանությունների ուսերին»:
Վահագն Խաչատրյանն այս առիթով հիշեց Ռոբերտ Քոչարյանին. «Թերևս այն պահից սկսած, երբ Ռոբերտ Քոչարյանը որոշեց Երևանը դարձնել գյուղաքաղաք, երբ զրկեց տրամվայից, մասամբ տրոլեյբուսից, որի արդյունքում ունեցանք գազելներով տեղափոխում: Այս վիճակը եկել է այդ ժամանակներին, և սա երևանցիներին ստորացնելու լավագույն միջոցն ու ձևն էր»:
Աղբի խնդրի մասին նախկին քաղաքապետը փաստեց՝ ակնհայտ է՝ Սանիտեքն ընդհանրապես չի զբաղվում սանմաքրմամբ, մինչդեռ մրցույթով սահմանված էր, որ նա պարտավոր է իրականացնել աղբի մաքրում և սանմաքրում. «Հիմա քաղաքային իշխանությանը փաստի առաջ է կանգնեցրել, պատերազմ են հայտարարել իրար, բայց տուժում ենք մենք: Համոզված եմ, որ Հայկ Մարությանն ու իր ամբողջ թիմն այն մարդիկ են, որ սրտացավ են, և ամեն ինչ անում են, որ մի օր առաջ այս ամենից դուրս գանք»:
Կարդացեք նաև
Տաթև ՀԱՐՈՒԹՅՈԻՆՅԱՆ
