«Իմ պատկերացմամբ՝ երեւի ավելի անհաջող իրավիճակ չէր կարող լինել, շատ անհաջող ընտրություն էր, որովհետեւ բոլորս Ռուբեն Վարդազարյանի «քաջագործություններին» տեղյակ ենք»,-«Մեդիա կենտրոն»-ում լրագրողների հետ հանդիպմանն այսօր անդրադառնալով Ռուբեն Վարդազարյանի՝ ՀՀ բարձրագույն դատական խորհրդի նախագահի պաշտոնում ընտրվելուն, ասաց իրավապաշտպան Մարինա Պողոսյանը:
«Երբ նա ԲԴԽ անդամ ընտրվեց, մենք խիստ գնահատական տվեցինք դրան, որովհետեւ նա «կլանայնության» կրողներից մեկն է եղել: Նա եղել է այն դատավորներից, որոնք առաջինը պետք է «վեթինգի» ենթարկվեին: Ռեժիմին ոչ հաճելի մարդկանց, ընդդիմադիրներին գաղտնալսել են, պահել, հետո՝ հարկ եղած դեպքում հետին թվով Վարդազարյանը որոշումներ է կայացրել»,-համոզմունք հայտնեց Մարինա Պողոսյանը:
Նա շեշտեց, որ իր ասածների մասին կարող է Ռուբեն Վարդազարյանին փաստաթղթեր ներկայացնել. «Վստահ եմ, որ նա որեւէ բան չի ունենա ասելու, որովհետեւ ինձ հայտնի են դեպքեր, երբ գաղտնալսման, ներքին եւ արտաքին դիտման որոշումները կայացվել են հետո՝ երբ պետք են եղել: Վարդազարյանը պատրաստ է եղել հետին թվով որոշումներ կայացնելու: Հասկանում եմ, որ ասածս կարող է հանցագործության մասին հաղորդում համարվել, բայց ես չեմ խուսափում դրանից եւ առաջիկայում պատրաստվում եմ հաղորդում տալ՝ Վարդազարյանի կատարածների վերաբերյալ»:
Իրավապաշտպանը կարծում է, որ Ռուբեն Վարդազարյանի ընտրմամբ ԲԴԽ-ն քրեականացվեց:
Կարդացեք նաև
Լուիզա ՍՈՒՔԻԱՍՅԱՆ
Լուսանկարը՝ «Մեդիա կենտրոն»-ի
