ՀՀ նախագահ Արմեն Սարգսյանը հուլիսի 20-ին Լոռու մարզ կատարած այցի ընթացքում ծաղիկներ խոնարհեց Ստեփանավանում Սոս Սարգսյանի հուշարձանին, որը գտնվում է վարպետի անունը կրող փողոցի հարակից այգում: Նախագահին դիմավորեցին մեղր ու հացով, մարդիկ ցանկանում էին լուսանկարվել նրա հետ, խոսել իրենց խնդիրներից: Աշոտ անունով իննամյա մի երեխայի նախագահը հարցրեց, թե ինչ է ուզում դառնալ, տղան սկզբում ասաց, որ չի որոշել: Քիչ անց ասաց, որ ինքն էլ է որոշել նախագահ դառնալ:
Արմեն Սարգսյանն այցելեց նաեւ Լոռի բերդ համայնք ու միջնադարյան Լոռի բերդ ամրոց, որտեղ 1966 թ-ից սկսած պեղումներ են կատարվում: Մասնագետների փաստմամբ, պեղումների արդյունքում այստեղ բացվել են ցեղապետների, ռազմական առաջնորդների, իշխանների, քրմական դասի ներկայացուցիչների եւ համայնականների հարյուրից ավելի դամբարաններ: Այստեղ նաեւ բացառիկ խաչքարեր կան:
Կարդացեք նաև
Գյուլագարակ համայնքի մանկապարտեզում նույնպես սպասում էին նախագահին, փոքրիկները նրա համար ՀՀ հիմնը երգեցին, լուսանկարվեցին: Մանկապարտեզը գործում է այս տարվանից, իսկ անցյալ տարվա դեկտեմբերին ՀՀ նախագահի աշխատակազմի կողմից մանկապարտեզին տրամադրվել է 1 մլն դրամ՝ գույք ձեռք բերելու նպատակով:
Օձունի Սուրբ Աստվածածին եկեղեցում (VI դար) ՀՀ նախագահին դիմավորեցին հոգեւոր դասի ներկայացուցիչները՝ Հայաստանյայց Առաքելական եկեղեցու Գուգարաց թեմի առաջնորդ Սեպուհի արքեպիսկոպոս Չուլջյանի գլխավորությամբ: Սրբազան հայրը Արմեն Սարգսյանին նվիրեց Հովհաննես Օձնեցի կաթողիկոսի մասին պատմող նկարազարդ գիրք: Ներկայացնելով հուշարձանը եւ հարակից տարածքը, հոգեւորականները նշեցին, որ Օձունի Սուրբ Աստվածածին եկեղեցուց հարեւանությամբ գտնվող. կանգուն կոթողը վաղ քրիստոնեական շրջանի կարեւոր հուշարձաններից է:
Ինչպես ամենուր, եկեղեցու մոտ եւս շատերը ցանկություն էին հայտնում լուսանկարվել ՀՀ նախագահի հետ, Արմեն Սարգսյանը ոչ մեկի չէր մերժում: Եկեղեցի մկրտվելու էր եկել նաեւ մի երիտասարդ զույգ, որի նշանադրությունը վերջերս էր կայացել; Նրանք նախագահին հրավիրեցին իրենց հարսանիքին: Նախագահն ասաց, որ չի կարող այդ օրը մասնակցել, սակայն սեպտեմբերին նրանց կընդունի Նախագահական պալատում: Լուսանկարվելիս անընդհատ ուշացող Հայկանուշ անունով հարսնաքրոջ մասին էլ կատակեց. «Հայկանուշին էլ չմոռանանք»:
Օձունից հետո նախագահը մեկնեց Ահնիձոր՝ Հրանտ Մաթեւոսյանի տուն:
Գոհար ՀԱԿՈԲՅԱՆ
