Այսօր Վերաքննիչ քրեական դատարանը՝ դատավոր Նարինե Հովակիմյանի նախագահությամբ, հրապարակել է Մարտի 1-ի գործով քննչական խմբի նախկին ղեկավար Վահագն Հարությունյանի խափանման միջոցի գործով բողոքների վերաբերյալ որոշումը:
Առաջին ատյանի դատարանը՝ նախագահությամբ դատավոր Աննա Մաթեւոսյանի, հունիսի 3-ին, քննելով Վահագն Հարությունյանի խափանման միջոցի հարցը, որոշել էր մերժել նրա նկատմամբ կալանավորումը որպես խափանման միջոց ընտրելու վերաբերյալ ՀՔԾ-ի միջնորդությունը:
Դատարանի այդ որոշումը բողոքարկել է ինչպես դատախազությունը, այնպես էլ Հարությունյանի պաշտպան Միհրան Պողոսյանը: Դատախազությունը պահանջել է բեկանել քննչական խմբի նախկին ղեկավարի նկատմամբ կալանավորումը որպես խափանման միջոց չընտրելու վերաբերյալ առաջին ատյանի դատարանի որոշումը, իսկ Վահագն Հարությունյանի պաշտպանը բողոք էր ներկայացրել, քանի որ համամիտ չէր դատական ակտում առկա որոշ ձեւակերպումների հետ:
Վերաքննիչ քրեական դատարանը որոշել է մերժել ե՛ւ դատախազության, ե՛ւ պաշտպանական կողմի ներկայացրած բողոքը, առաջին ատյանի դատարանի որոշումն էլ թողել է անփոփոխ:
Կարդացեք նաև
Հիշեցենք, որ Վահագն Հարությունյանը մեղադրվում է ապացույցներ կեղծելու, պաշտոնեական լիազորությունները չարաշահելու համար, որն անզգուշությամբ առաջացրել է ծանր հետեւանքներ, ինչպես նաեւ պաշտոնեական լիազորություններն անցնելու համար, որը զուգորդվել է բռնությամբ: Նրա նկատմամբ հետախուզում է հայտարարված:
Հռիփսիմե ՋԵԲԵՋՅԱՆ
