Օպերային երգիչների այցեքարտը համարվում է այս կամ այն դերերգի փայլուն կամ տպավորիչ մեկնաբանությունը, ինչն էլ ողջ կարիերայի ընթացքում մեծ հաշվով ուղեկցում է նրանց:
Այցեքարտ ունի նաեւ օպերային սոպրանո Տաթեւիկ Աշուրյանը, այն է՝ Մադամ Բաթերֆլայ Պուչինիի համանուն օպերայում: Այս դերերգի լավագույն կատարման համար երգչուհին արժանացել է հատուկ մրցանակի՝ 2013թ. Մոլդովայում կայացած Մարիա Բիեշուի անվան միջազգային մրցույթում: Այս կերպարում էր նրան տեսնում մեր օպերային թատրոնի գեղարվեստական ղեկավար, երջանկահիշատակ Գեղամ Գրիգորյանը: Այդպես էլ Տաթեւիկ Աշուրյանին մինչ օրս որեւէ գլխավոր դերերգով չենք հանդիպել թատրոնում: Թեեւ նրան մասնագիտական շրջանակներում բարձր են գնահատել, օրինակ՝ Տաթեւիկ Սազանդարյանի, Գոհար Գասպարյանի մրցույթներում:
Լեոնորայի կերպարում (Տորոնտոյի թատրոն, 2013թ.)
Ի դեպ, 2012թ. ՀՀ նախագահի երիտասարդական մրցանակաբաշխությանը սոպրանոյի մասնակցությունից հետո, որպես գլխավոր մրցանակակրի հավակնորդ, հոլովվում էր նաեւ Տաթեւիկ Աշուրյանի անունը, բայց այդպես էլ ոչ ոքի չշնորհվեց մրցանակը:
Տաթեւիկ Աշուրյանը՝ Ռենե Ֆլեմինգի հետ
Երեւանի օպերային թատրոնում երգչուհուն հանդիպել ենք ընդամենը երկու երկրորդական դերերգի կատարումներով՝ Ընկերուհի՝ Տիգրանյանի «Անուշ», Պուսետ՝ Մասնեի «Մանոն» օպերաներում:
Հովարդ Վատկինսի հետ
Փոխարենը՝ 2012թ. սոպրանոն կանադական «Օպերա Բելկանտո» ընկերության կողմից հրավիրվել է Տորոնտոյի թատրոն՝ հանդես եկել Լեոնորայի դերերգով՝ Վերդիի «Տրուբադուրում»: Այս առիթով «Առավոտի» հետ զրույցում արվեստագետը հիշեց. «Տորոնտոյում էի շուրջ մեկ տարի ու մասնակցում էի մշակութային կյանքին: Հինգամսյա հրավերիս ժամկետը երկարաձգելու խնդրանքով տեղի քաղաքապետը դիմել էր Մոսկվա…»: Դիտարկմանը, թե վերադարձաք Երեւան ու փաստորեն՝ «լռում» եք մինչ օրս, երգչուհին պատասխանեց. «Դա այդպես չէ: Հենց Երեւանի թատրոնում մասնակցել եմ մաեստրո Կոնստանտին Օրբելյանի նախաձեռնած բոլոր վարպետության դասերին՝ ճանաչված այնպիսի հռչակավոր երգիչների ղեկավարությամբ, ինչպիսիք են, օրինակ, Ռենե Ֆլեմինգը, Հովարդ Վատկինսը:
Պուսետի կերպարում (Երեւանի թատրոն, 2018թ.)
Թատրոնում առաջին քայլերս եմ արել Լեւոն Ջավադյանի ղեկավարած «Երիտասարդական օպերային ծրագրում»: Ռեպլիկին՝ ասում են, նոր եք վերադարձել դասերից՝ այս անգամ Իտալիայում անցկացվող, մեր զրուցակիցը հայտնեց. «Իտալիայում կայացած վարպետության դասերի նպատակը նեոպոլիտանական երգերի ճիշտ մատուցումն էր: Դասերը վարում էր դիրիժոր, կոմպոզիտոր Ջուզեպե Կարաննտեն, որը հետաքրքրված էր հայկական արվեստով, մասնավորապես՝ Կոմիտասով ու դուդուկով: Մտերմացել էի նրա հետ եւ արդյունքում մաեստրոն որոշեց գրել ստեղծագործություն ձայնի, դուդուկի եւ սիմֆոնիկ նվագախմբի համար: Ճանաչված երաժիշտը հրավիրյալ դիրիժոր է նաեւ Ռումինիայի թատրոնում, ինձ առաջարկեց հանդես գալ նաեւ Բուխարեստում: Հրաժարվեցի, որովհետեւ Երեւանի թատրոնում ես դեռ ծրագրեր ունեմ…»: Տաթեւիկ Աշուրյանը հավելեց, թե իտալացի երաժիշտը նաեւ բարձրակարգ կլարնետահար է եւ հավաստիացրել է՝ Երեւան գալուն պես պատրաստ է անցկացնել անվճար վարպետության դասեր:
ՍԱՄՎԵԼ ԴԱՆԻԵԼՅԱՆ
«Առավոտ» օրաթերթ,
18.07.2019
