«Ունեցանք անկաշկանդ, բովանդակային զրույց, որպեսզի հասկանանք խնդիրները եւ լուծումները»,- Տավուշի մարզում քիչ առաջ ավարտված խորհրդակցությունից հետո հայտարարեց ԱԱԾ ղեկավար Արթուր Վանեցյանը:
Հիշեցնենք, երեկ առավոտից Տավուշի մարզում լարված իրավիճակ էր, երեկոյան ոստիկանների եւ քաղաքացիների միջեւ ընդհարում էր տեղի ունեցել: Այսօր, մարզպետարանում, տարբեր գերատեսչությունների ղեկավարների եւ համայնքապետերի մասնակցությամբ խորհրդակցություն էր տեղի ունեցել:
ԱԱԾ ղեկավարի`Տավուշի մարզի ազգաբնակչությանն ուղղված ուղերձը հետևյալն է`Տավուշի մարզը բացառիկ է իր անտառներով եւ այդ անտառներն ավելի արդյունավետ կարող են օգտագործվել, քան դրանք վառելանյութ եւ փայտանյութ դիտելը: Արթուր Վանեցյանն ասաց, որ մարզի անտառները կարող են զբոսաշրջային բացառիկ նշանակության համար օգտագործվել եւ կառավարությունը համապատասխան օրենսդրական փոփոխություններ է նախաձեռնել`բնակչությանը թույլատրելու այդ վայրերը զբոսաշրջային նպատակներով ծառայեցնելու:
Արթուր Վանեցյանն ասաց, որ քննարկվել է եւ բոլորի կողմից ընդունելի է եղել նաեւ այն տարբերակը, որ անտառից հանվող փայտանյութը`«փափուկ փայտը», հասնի հասցեատերերին`այն քաղաքացիներին, որոնք դա օգտագործելու են իրենց կացարանները ջեռուցելու համար: Համայնքների ղեկավարները առաջարկել են, որ պետությունը համապատասխան ծառայությունների միջոցով հավաքվի այդ փայտանյութը, ապա մարզպետարանների կամ համայնքապետարանների միջոցով հասցվի քաղաքացիներին:
Կարդացեք նաև
Ո՞ւմ կանաչներն են այս ամենի ետեւում`հարցրեց լրագրողներից մեկը`հղում անելով այն հայտարարություններին, որ այս պատմության մեջ կոռուպցիոն ռիսկեր կան:
«ԱԱԾ-ն վերջին շրջանում տարբեր անտառախիտ մարզերի տարածքում օպերատիվ-հետախուզական գործողություններ է իրականացրել, միայն ԱԱԾ-ի կողմից ավելի քան 10 քրեական գործ է հարուցված`ապօրինի անտառահատումների մասով: Այդ գործերում ներգրավված են թե անտառտնտեսության մի շարք պաշտոնատար անձինք, թե իրավապահներ»,- հայտարարեց Արթուր Վանեցյանը: Բոլոր գործերով քննչական կոմիտեն է զբաղվում, ուստի ԱԱԾ պետը հորդորեց` այդ հարցերով մանրամասներ ստանալ այնտեղից:
Տավուշցիներին էլ հորդորեց այսուհետ ձեռնպահ մնալ ոստիկանների հետ ընդհարումներից եւ բոլոր հարցերի պատասխանները փորձել ստանալ մարզպետարաններից կամ համայնքապետարաններից:
Նելլի ԳՐԻԳՈՐՅԱՆ
