Ճանապարհային ոստիկանության վարչական շենքի դիմաց այսօր բողոքի ցույց էին անում «Տուգանք» հասարակական նախաձեռնության մի քանի անդամ-վարորդներ:
Նրանց պահանջն է՝ աշխատանքից ազատել ՃՈ երեք պաշտոնյաների՝ ՃՈ պետի հաշվառման-քննական եւ տեխնիկական փորձաքննության գծով տեղակալ Արթուր Տոնոյանին, ՃՈ պետ Արմեն Հակոբյանին, ՃՈ ճանապարհային երթևեկության կազմակերպման հսկողության բաժնի պետ Կոնստանտին Կոստանյանին:
«Վերջինիս ոչ պատշաճ աշխատանքի պատճառով վարորդները մշտապես խնդրի առաջ են կանգնում: Ունենք համապատասխան տեսանյութեր: Նա «լեվի» խաչմերուկներ է սարքում, չգիտեմ ինչ հարաբերությունների մեջ է որոշ մարդկանց հետ: Ինչ-որ մեկի տան մոտ թերի խաչմերուկներ են սարքված՝ թերի կահավորմամբ: Նա պետք է իր արածի համար վերջիվերջո պատասխան տա: Իսկ Արթուր Տոնոյանը չի հետեւում տարրական պայմաններին, չի հետեւում հերթերին, որոնցում կանգնած են մարդիկ՝ ժամերով, արեւի տակ: 24-ժամյա հերթեր են: Հերթերը վաճառում են: Մարզերի բաժիններում էլ բարդակ է, մարդիկ «գոմ» են անվանում: Իսկ Արմեն Հակոբյանն էլ իրավիճակին ու իր գործին չի տիրապետում, նա ոչ մի բանի չի տիրապետում»,-լրագրողների հետ զրույցում հայտարարեց «Տուգանք»-ի անդամ Արտակ Խաչատրյանը (լուսանկարում):
Նա նաեւ տեղեկացրեց, որ ցանկացել են հանդիպել նշյալ երեք պաշտոնյաների հետ, սակայն ընդունարանում պատասխանել են, որ նրանք տեղում չեն, մեկն էլ արձակուրդում է:
Կարդացեք նաև
https://www.facebook.com/aravot.am/videos/435629027035081/
Բողոքի ցույցին միջամտեց մի քաղաքացի՝ ասելով, որ կողքից լսում էր, եւ իրեն դուր չեկան ՃՈ երեք պաշտոնյաների մասին ասածները:
Աշոտ Ռեւազյանը ներկայացավ որպես «Հյուսիս-հարավ» ծրագրի ընկերությունների մեկի ներկայացուցիչ, որն աշխատում է Մարալիկում եւ տեղի երթեւեկության կազմակերպման ինժեներն է, ու բանավեճի մեջ մտավ ցուցարար-վարորդների հետ. «Լավ էլ աշխատում են նրանք, վաղուց եմ ճանաչում նրանց, հետներն աշխատում եմ: Այսքան ժամանակ չէի տեսել, որ նրանցից դժգոհեն: Ճիշտ չեն արտահայտվում նրանց մասին: Ի՞նչ «լեվի» խաչմերուկ…անիմաստ բաներ եք խոսում»:
Ցուցարար-վարորդները պնդեցին, որ Աշոտ Ռեւազյանին կարող են նստեցնել իրենց մեքենան եւ քաղաքում պտտեցնելով՝ ցույց տալ ճանապարհային երթեւեկության խնդիրները, Ռեւազյանն էլ պնդեց, որ ինքն էլ կարող է իր մեքենայով ցույց տալ, թե ինչ է փոխվել:
https://www.facebook.com/aravot.am/videos/814921682235787/
Լուիզա ՍՈՒՔԻԱՍՅԱՆ
