Հայաստանի վարչապետ Տիգրան Ավինյանը կարծում է, որ Ռուսաստանի, Վրաստանի, Հայաստանի և Իրանի էներգացանցերի միավորումը ցանկության դեպքում կարելի է ավարտին հասցնել 2-3 տարում:
Ավինյանը գտնվում է Նյու Յորքում, որտեղ մասնակցում է ՄԱԿ-ի միջոցառումներին:
«Մենք այժմ կառուցում ենք բարձր լարման գծեր և՛ Վրաստանի, և՛ Իրանի հետ: Ամբողջ տրամաբանությունը նրանում է, որ մենք, Վրաստանը, Իրանը և Ռուսաստանը ցանցում աշխատենք համաժամանակյա: Այդ գործակցությունը շատ կարևոր է: Այժմ մենք ցանկանում ենք կառուցել համակարգ, որը հնարավորություն կտա համաժամանակյա աշխատել Ռուսաստանի հետ կամ կոնվերտացնել հաճախականությունը, որպեսզի մենք կարողանանք կապված լինել»,- ասել է Ավինյանը «ՌԻԱ Նովոստիի» հետ զրույցում:
Նրա խոսքով՝ ցանցերի միավորման նպատակն է «ունենալ մեկ գլոբալ շուկա և գլոբալ էներգետիկ ենթակառուցվածքներ»:
Կարդացեք նաև
«Եթե ինտենսիվ աշխատենք, 2-3 տարուց դա արդեն կիրականանա»,- ասել է նա:
2015թ. դեկտեմբերին Հայաստանը, Վրաստանը, Իրանը և Ռուսասանը ստորագրել են քառակողմ հուշագիր, որով նախատեսվում է բարձրացնել էլեկտրաէներգիայի, էլեկտրական համակարգերի անվտանգության և հուսալիության համատեղ նախագծերի կառավարման մակարդակը: Հուշագրի շրջանակում նախատեսվում են մի շարք միջոցառումներ,՝ ուղղված Հյուսիս-հարավ էլեկտրաէներգետիկ միջանցքի ստեղծմանը, ինչը հնարավորություն կտա աշխատել ԵԱՏՄ և ԵՄ էներգահամակարգերի հետ:
Պատրաստեց՝ Վիկտորյա ԱՆԴՐԵԱՍՅԱՆԸ
