«Լուսավոր Հայաստան» խմբակցության պատգամավոր Արման Բաբաջանյանն այս գիշեր Իջեւանում տեղի ունեցած միջադեպի առնչությամբ ուղիղ եթերում հայտնել է. «Ինձ ոստիկանները պատմեցին, որ վեց հարյուր հոգի փակել էր միջպետական ճանապարհը եւ ոստիկանների պահանջին չենթարկվելուց հետո պատրաստված՝ քարերով եւ փայտերով, հարձակվել են ոստիկանների վրա»:
Ապօրինի ծառահատման առնչությամբ նա նշեց. «Տարիներ շարունակ ուղղորդված հատել են անտառները եւ այդպես ապրուստի միջոց ունեցել, եւ հիմա իշխանությունները թույլ չեն տալիս, որ հին ավանդույթը շարունակվի: Հիմնական եկամուտներ ստացողները սղոցարաններում աշխատող բանվորներին ուղղորդել են այդ գործողություններին»:
ԼՀԿ պատգամավոր Սարգիս Ալեքսանյանն էլ ուղիղ եթերում հայտնեց՝ Տավուշի մարզպետ Հայկ Չոբանյանն իրեն ասել է, որ ցուցարարներին առաջարկել է օգնել աշխատանքի տեղավորվել, բայց մերժում է ստացել: «Համաձայնության չեն եկել, քանի որ փայտի գործի շահույթը շատ ավելի մեծ է, քան մարզպետի առաջարկը»,-նշեց Սարգիս Ալեքսանյանը:
Արման Բաբաջանյանն ուղիղ միացում է ապահովել նաեւ Իջեւանի բժշկական կենտրոնից, որտեղ տարվել են միջադեպի հետեւանքով վիրավորված տասից ավելի ոստիկանները:
Կարդացեք նաև
«Ժեշտերն ու շիթերը շպրտել են վրաս»,-Արման Բաբաջանյանի ուղիղ եթերում ցուցարարների հետ տեղի ունեցած միջադեպից այսպիսի մանրամասներ պատմեց վիրավորված ոստիկաններից մեկը: Արման Բաբաջանյանը ճշտեց՝ «ասում էին՝ խմած են եղե՞լ»: Ի պատասխան մյուս ոստիկանն ասաց. «Կեսից շատը խմած էին»:
Բժիշկներից Ներսիսյանն էլ տեղեկացրեց, որ հիվանդանոց տեղափոխված վիրավորներից 12-ը ոստիկաններ են, 2-ը՝ քաղաքացիներ՝ հիմնականում սալջարդերով, մարմնի տարբեր հատվածների վնասվածքներով. «Մի հատ ծակած վերք էլ կա: Քարն էլ կծակի, փայտն էլ: Կա նաեւ ուղեղի ցնցման երկու եւ քթոսկրի կոտրման մեկ դեպք»: Բժշկի փոխանցմամբ՝ գիշերը քաղաքացիներն արդեն դուրս են գրվել հիվանդանոցից, իսկ ոստիկանների վիճակը բավարար է, մի քանիսը մշտական վերահսկողության ներքո են:
Մեկ այլ վիրավոր ոստիկան էլ Արման Բաբաջանյանի հարցադրմանն ի պատասխան ասաց՝ ինքը եւս փաստում է, որ ցուցարարները խմած են եղել՝ նրանք, ում հետ ինքն առնչվել է:
Հիշեցնենք, որ Իջեւանում ճանապարհ էին փակել «փայտի գործ» անողները, որոնց եւ ոստիկանների միջեւ բախում էր տեղի ունեցել:
https://www.facebook.com/babajanyana/videos/2344893322417569/?__xts__%5B0%5D=68.ARC2nvSXBQmyuVcthSfNvzv1HZBH0Av54WcWkoF45gvUhw0S9IblFVl9zLkdACHgSkk2Sh74UP9XEZb2EwZhWRqdMO2bn0FREuVII-CzYYbw-8rnO1oDQcbao1bsZbu6tyvgaI8ZmI3Oh8Zs9jy8gkAxvNoGw5iGBgXG2WhdRSeiQu0mzdCNOShVDHg5EYSpboR9aMN5nrYJ_Z0M-YqdwM6DKHuVPMK9hIwW_dFf8wwAC4cVU6-fy9JHcSyzN3hw3Clijx8bnpXP83tXpaKVpu2KBTM8R-ukbckY2xvTNoNlWx5j6gre1pKzHP9F9UtERX52yzTN9FSTjEOClUtDCZrBnUz1KoeLr9KL9lxW&__tn__=-R
Լուիզա ՍՈՒՔԻԱՍՅԱՆ
Լուսանկարները՝ Արման Բաբաջանյանի ֆեյսբուքյան էջից
