Կրակոցներ եւ զոհեր կունենա՞նք, Բաքվի եւ Երեւանի միջեւ թեժ գիծն աշխատո՞ւմ է՝ «Ազատության» ուղիղ եթերում ՀՀ վարչապետ Նիկոլ Փաշինյանին հարցրեց Հրայր Թամրազյանը: «Այո աշխատում է, բայց դա չի երաշխավորում, որ մենք, ցավոք սրտի, զոհեր չենք ունենա…Մենք աշխատում ենք, որ բանակցություններն ունենան կոնկրետ արդյունք»,-պատասխանեց Նիկոլ Փաշինյանը:
«Ինչու բանակցությունները չունեն կոնկրետ արդյունք: Ես միջազգային հանրության ներկայացուցիչների հետ, երբ որ ուզում եմ իրենց նկարագրել իրավիճակը, թե ինչու առաջ չեն գնում բանակցությունները, նշում եմ, որ դրա համար կա ընդամենը մեկ պատճառ:
Երբ ես ընտրվեցի ՀՀ վարչապետ, ամբիոնից հայտարարեցի, որ Ղարաբաղի հարցի լուծման որեւէ տարբերակ պետք է ընդունելի լինի Հայաստանի ժողովրդի համար, Ղարաբաղի ժողովրդի համար եւ Ադրբեջանի ժողովրդի համար: Սա ինչ-որ առումով աննախադեպ հայտարարություն էր մեր իրականության մեջ: ՀՀ ոչ մի ղեկավար չի ասել, որ որեւէ լուծում նաեւ Ադրբեջանի ժողովրդի համար պետք է ընդունելի լինի: Սա շատ կարեւոր հայտարարություն է, եւ լուրջ հիմք է ստեղծում բանակցությունների առաջընթացի համար: Իսկ ինչո՞ւ չկա այդ առաջընթացը՝ շատ պարզ պատճառով, որովհետեւ Ադրբեջանի նախագահը հրաժարվում է արտաբերել նույն նախադասությունը…Քանի այս նախադասությունը չի հնչել այն կողմից, նշանակում է բանակցություններն արդյունավետ չեն»,-ասաց Փաշինյանը
Գոհար ՀԱԿՈԲՅԱՆ
