Ադրբեջանում Վրաստանի դեսպան Զուրաբ Պատարաձեն ստիպված է եղել բացատրություն տալ և արդարանալ՝ կապված վրաց-ադրբեջանական միջազգային սահմանին Դավիդ Գարեջայի վանական համալիրի շուրջ հերթական միջադեպի հետ:
Ավելի վաղ Վրաստանի սահմանամերձ գյուղերից մի խումբ բնակիչներ փորձել էին անցնել սահմանը դեպի ադրբեջանական տարածքում գտնվող Ուդաբնո համալիր, չնայած Ադրբեջանի սահմանային ծառայության աշխատակիցների զգուշացումներին: Նշվում է, որ չնայած սահմանապահների նկատմամբ ֆիզիկական բռնությանը, վերջիններս չեն օգտագործել ո՛չ զենք, ո՛չ էլ ոչ մահաբեր հատուկ միջոցներ:
Սահմանն ապօրինի հատելու միջադեպը նկարահանվել է և տարածվել, ինչը տեղի որոշ լրատվամիջոցների հիմքեր է տալիս մտածելու, որ միջադեպը սադրանք է՝ ցույց տալու, որ երկու հարևանների միջև անհաղթահարելի վեճ կա:
Ադրբեջանի ԱԳՆ-ն Վրաստանի դեսպան Պատարաձեից ոչ միայն բացատրություն է պահանջել, այլև պահանջել է հետագայում տեղյակ պահել՝ ինչ քայլեր են ձեռնարկել Վրաստանի իշխանությունները միջադեպի մասնակիցների նկատմամբ: Դիվանագիտական լեզվով ասած՝ դա նշանակում է, որ Բաքուն ուշիուշով հետևելու է Թբիլիսիի արձագանքին և քայլեր կձեռնարկի արդեն այն բանից հետո, երբ կգնահատի Վրաստանի իշխանությունների արձագանքը: Առայժմ Ադրբեջանի ԱԳՆ-ն սահմանափակվել է միայն գրավոր բացատրությամբ՝ չդիմելով առավել կոշտ դիվանագիտական միջոցների:
Կարդացեք նաև
Երկու երկրների սահմանային գերատեսչությունների բանակցությունների արդյունքում որոշվել է ժամանակավորապես (առայժմ մեկ շաբաթով) փակել այդ հատվածում վրաց-ադրբեջանական սահմանը: Այդպիսով, մի քանի օր Վրաստանի տարածքով չի թույլատրվի անցնել Ուդաբնո մենաստան, ընդ որում այդ պայմանավորվածության երաշխավորներ հանդես են գալու հենց վրացի սահմանապահները, չնայած ազգայնականների դժգոհություններին:
Միջադեպի կապակցությամբ հայտարարություն է արել Վրաստանի վարչապետ Մամուկա Բախտաձեն՝ նշելով, որ սահմանազատման հարգերով վրաց-ադրբեջանական հանձնաժողովը կշարունակի աշխատանքը առաջիկա շաբաթներին:
«Հանձնաժողովն առաջիկա շաբաթներին կվերականգնի աշխատանքը, և բնականաբար, մենք հաշվետվություն ունենք հանձնաժողովի հանդիպման մասին, բայց ես ցանկանում եմ ընդգծել, որ համապատասխան գերատեսչություններն ամենօրյա ռեժիմով կապ են պահպանում Ադրբեջանի գործընկերների հետ»,- ասել է նա:
Վրաց-ադրբեջանական սահմանի գծանշման և սահմանազատման հանձնաժողովն իր աշխատանքները վերսկսել է ութ տարվա ընդմիջումից հետո: Հանձնաժողովի առաջին նիստը տեղի է ունեցել մայիսի 23-24-ին Բաքվում, հաջորդ նիստը նախատեսվում է Թբիլիսիում: Այս պահին երկու երկրների փորձագետները տեղերում ուսումնասիրում են վիճելի հատվածները:
«Ես ցանկանում եմ դիմել բոլորին. սա շատ զգայուն հարց է, և ես կոչ եմ անում բոլորին՝ հնարավորություն տալ հանձնաժողովին և մյուս գերատեսչություններին խնդիրը լուծել աշխատանքային ռեժիմով»,- ասել է Բախտաձեն:
Պատրաստեց՝ Վիկտորյա ԱՆԴՐԵԱՍՅԱՆԸ
