Հայաստանում ՔԿՀ-ներում խոշտանգումների դեպքերով 2015-ից մինչ այսօր դատարանների կողմից չի արձանագրվել եւ ոչ մի դեպք. չորս գործ է ուղարկվել դատարան, մեկով արդարացման վճիռ է եղել, դատախազությունը բողոքարկել է այն: Այդ մասին այսօր լրագրողների հետ զրույցում ասաց ՀՀ մարդու իրավունքների պաշտպան Արման Թաթոյանը:
ՄԻՊ-ի ներկայացրած վիճակագրությունը`ՔԿՀ-ներում խոշտանգման հանցակազմի մասով`տեսանյութում
Արման Թաթոյանն ասաց, որ քրեական ենթամշակույթը Հայաստանի ՔԿՀ-ներում վերացած չէ: ՄԻՊ գրասենյակը հայեցակարգ է մշակել, որն ուղարկվել է կառավարություն, արդարադատության նորանշանակ նախարարի հետ Արման Թաթոյանը քննարկել է այս հարցը: Առաջիկայում, կարծում է, այն լայն քննարկման առարկա կդառնա:
Կարդացեք նաև
ՄԻՊ-ի նախաձեռնությամբ մշակվել է ազատազրկվածի իրավախորհրդատու ավտոմատացված համակարգ Facebook սոցիալական ցանցի Messenger հավելվածում: Լրագրողների հետ այսօրվա հանդիպման ժամանակ Արման Թաթոյանը ներկայացրեց այս նորարարությունը: «Համակարգն այլ կերպ կոչվում է վիրտուալ զրուցակից: Սա առաջին անգամն է, որ Հայաստանում ներդրվում է պետական համակարգի կողմից և այն էլ ՄԻՊ-ի կողմից, իսկ դա նաեւ աշխարհում միջազգային փորձի ընդունված ձեւ է»,- ասաց նա:
ՀՀ մարդու իրավունքների պաշտպանը պաշտոնապես դիմել է facebook սոցիալական ցանցին եւ ստացել է թույլտվություն՝ բացելու այս համակարգը. «Այս համակարգը պարունակում է մոտ երեք հարյուր հարց: Համակարգը հնարավորություն է տալիս գտնել այն հարցերի պատասխանները, որոնք առնչվում են ազատությունից զրկվածին՝ սկսած այն պահից սկսած, երբ ոստիկանը մոտենում է մարդուն, օրինակ, փողոցում և մարդը այլևս հնարավորություն չի ունենում լքել այդ վայրը իր կամքով կամ ստիպված է հետևել ոստիկանի կամքին, մինչեւ ՔԿՀ-ում դատապարտվելը եւ բոլոր պայմանները միասին վերցված»,- նշեց նա:
Համակարգը շուտով կլինի նաեւ անգլերեն լեզվով:
Նելլի ԳՐԻԳՈՐՅԱՆ
