Էրեբունի վարչական շրջանի աշխատակազմի աշխատակիցները վարչական շրջանի ղեկավար Արման Աբրահամյանի կողմից ներկայացվել են պարգեւատրման եւ Երեւանի քաղաքապետարանի կողմից ստացել աշխատավարձի 50-200%-ի չափով պարգեւավճարներ՝ 2019թ.-ի երկրորդ եռամսյակում կատարած աշխատանքի համար:
Այս մասին Aravot.am-ին հայտնեց Էրեբունի վարչական շրջանի ղեկավար Արման Աբրահամյանը: Նա նշեց. «Այս տարվա առաջին եռամսյակի պարգեւավճարների առնչությամբ ես հանդիպեցի ողջ աշխատակազմի հետ՝ ասելով, որ այս անգամ բոլորը հավասար չափով են պարգեւավճար ստանալու՝ առանց տարանջատման, թեեւ ենթադրելի է, որ պարգեւավճարն ըստ աշխատանքի չափի է սահմանվում: Նաեւ բոլորին ասացի՝ խնդրում եմ ձեզ, որ երկրորդ եռամսյակում լինեք ավելի ակտիվ եւ ոլորտում նախաձեռնող, ուստի երկրորդ եռամսյակի պարգեւավճարների դեպքում այս սկբունքն է գործել:
Առավել մեծ չափով պարգեւատրվել են բաժինների որոշ աշխատակիցներ, օրինակ՝ կոմունալ բաժնի հերթապահ աշխատակիցներ, արտաժամյա մնացող աշխատակիցներ: Խոսքն այն աշխատակիցների մասին է, որոնք հավելյալ աշխատանք են կատարում, անընդհատ ծանրաբեռնված են, դրսում են, վերահսկում են այս կամ այն կազմակեպությունների աշխատանքը: Այս սկզբունքը հաշվի առնելով՝ նրանք ավելի մեծ չափով պարգեւավճար են ստացել՝ մյուսների համեմատությամբ: Կան նաև աշխատակիցներ, որոնք չեն ստացել պարգևավճարներ: Այդ աշխատակիցներն ունեն կամ նկատողություն կամ թերացել են իրենց աշխատանքում»:
Լուիզա ՍՈՒՔԻԱՍՅԱՆ
