Վենետիկի հանձնաժողովում Հայաստանը ներկայացնում են սահմանադրագետ Վարդան Պողոսյանը եւ ԲԴԽ նախկին նախագահ Գագիկ Հարությունյանը։ Իրավաբաններից ոմանք, ինչպես փաստաբաններ Մուշեղ Շուշանյանը եւ Լուսինե Հակոբյանը, վստահ են, որ հենց նրանք էլ ներկայացրել են Վենետիկի հանձնաժողովին Հայաստանի իրավիճակի, ՍԴ-ի ճգնաժամի մասին զեկույցը։
«Վարդան Պողոսյանին եւ Գագիկ Հարությունյանին հանձնաժողովում նշանակել է նախորդ հանցավոր ռեժիմը, եւ նրանք սպասարկում են վերջինիս շահերը։ Նախորդների շահերը սպասարկողների տարածած այն տեղեկությունը, որ Վենետիկի հանձնաժողովն իբր դիրքորոշում է արտահայտել ՀՀ ՍԴ շուրջ ստեղծված իրավիճակի վերաբերյալ, կեղծիք է։
Մեր տեղեկություններով, Վենետիկի հանձնաժողովում Վարդան Պողոսյանն է նման զեկույց ներկայացրել, դա ընդամենը նրա զեկույցի արձանագրությունն է, Վենետիկի հանձնաժողովի դիրքորոշման մասին խոսք լինել չի կարող»,– համոզված է Լուսինե Հակոբյանը։
Ըստ Մուշեղ Շուշանյանի, առկա ճգնաժամային իրավիճակը կարելի է արագ հանգուցալուծել։ «Դրա համար անհրաժեշտ է, որ կառավարությունն առաջադրի ՍԴ դատավորների թափուր տեղերի համար թեկնածուներ, իսկ ԱԺ-ն հանդես գա հստակ դիրքորոշմամբ, որ ՍԴ անդամներն իշխանություն են եւ իրավասու չեն ՍԴ անունից որեւէ լիազորություն իրականացնել։ ԱԺ-ի կողմից ՍԴ դատավորներ ընտրելուց հետո իրավիճակն արդեն ամբողջությամբ կկարգավորվի»,– գրում է նա սոցցանցի իր էջում՝ կասկած հայտնելով, սակայն, որ այս կառավարությունն ու խորհրդարանը կկատարեն այս քայլերը։
Կարդացեք նաև
Հիշեցնենք, որ Վենետիկի հանձնաժողովի լիագումար նիստը տեղի էր ունեցել մոտ մեկ ամիս առաջ։ Այն ժամանակ եւս Վենետիկի անդրադարձը ՍԴ-ի շուրջ վերջին զարգացումներին ու Սահմանադրական դատարանի գործող անդամների հրապարակային հայտարարություններին մեծ աղմուկ բարձրացրեց հանրության, քաղաքական ու իրավական շրջանակների ներկայացուցիչների շրջանում։
Սյուզան ՍԻՄՈՆՅԱՆ
Հոդվածն ամբողջությամբ կարող եք կարդալ «Հրապարակ» թերթի այսօրվա համարում
