Ժամանակն է, որ Ուկրաինան սկսի Հայաստանին նայել նոր դիտանկյունից: Այս մասին AnalitikaUA.net պորտալի հետ զրույցում հայտարարել է միջազգային քաղաքականության հարցերով փորձագետ Իլյա Կուսան:
Ըստ փորձագետի՝ հայ-ուկրաինական հարաբերություններում այժմ շատ հարմար պահ է մերձեցում սկսելու համար:
«Ուկրաինային պետք է Հայաստանը, Հայաստանին պետք է Ուկրաինան, և տեղերում համայնքները կարող են առանցքային դեր խաղալ այդ գործում: Դրա համար, իհարկե, անհրաժեշտ է պետական քաղաքականություն, սփյուռքի հետ համակարգված աշխատանք: Եթե կա քաղաքական կամք և ցանկություն, եթե գործի դնեն համայնքները և սկսեն համագործակցություն մշակութային մակարդակով և օգտագործեն կրոնական դիվանագիտություն, կարծում եմ դա միանգամայն իրականանալի է»,- ասել է Կուսան՝ հավելելով, որ ժամանակն է, որ Ուկրաինան Հայաստանին նոր դիտանկյունից նայի:
Անդրադառնալով Հայաստանի արտաքին քաղաքականությանը՝ փորձագետը նշել է, որ պաշտոնական Երևանի քայլերը բավականին դրական և գրագետ են. դա վերաբերում է և՛ Իրանի հետ ավելի սերտ հարաբերությունների ձևավորմանը, և՛ Կիպրոսի և Հունաստանի հետ տարածաշրջանային դաշինքին, որը բավականին հետաքրքիր աշխարհաքաղաքական կոմբինացիա է: Եվ այդ ամենը ցույց է տալիս, որ Հայաստանի նոր իշխանությունները ի վիճակի են խաղալ մեծ քաղաքականության մեջ:
Կարդացեք նաև
«Դրանով հանդերձ Փաշինյանին հաջողվում է պահպանել հարաբերությունները Ռուսաստանի հետ, ինչը թույլ է տալիս պահել վստահելի հարաբերություններ: Աշխատանք է տարվում համաշխարհային դերակատարների՝ Արևմուտքի և Չինաստանի հետ: Դա գրագետ քաղաքականություն է, որը, սակայն, պահանջում է ռեսուրսներ, և այստեղ Փաշինյանի համար գլխավոր մարտահրավերը հավասարակշռությունը պահելն է: Հավասարակշռություն պահելը միշտ բարդ է, բազմավեկտորությունը միշտ պահանջում է ավելի շատ ռեսուրսներ, բայց առայժմ, ինձ թվում է, Հայաստանը ճիշտ ուղղությամբ է շարժվում, և այստեղ կարևոր է պահպանել հավասարակշռությունը և մշակել առաջիկա 5-10 տարվա համակարգված քաղաքականություն»,- ասել է փորձագետը:
Պատրաստեց՝ Վիկտորյա ԱՆԴՐԵԱՍՅԱՆԸ
