Հուլիսի 14-ին Հայաստանում Ֆրանսիայի դեսպան Ժոնաթան Լաքոթը, ՀՀ-ում Ֆրանսիայի դեսպանատան մշակույթի և համագործակցության հարցերով խորհրդական Ալեքս Բորտոլանն ու բազմաթիվ այլ հյուրեր մասնակցեցին Մասիսի Ֆրանկոֆոնիայի բուլվարում կայացած միջոցառմանը` նվիրված Ֆրանսիայի ազգային տոնին:
Միջոցառումը կազմակերպվել էր Մասիսի զարգացման հիմնադրամի ու Մասիսի երիտասարդական կենտրոնի կողմից AFFA (Adibekyan Family Foundation for Advancement) բարեգործական հիմնադրամի աջակցությամբ:
Դեսպանը հյուրերի հետ մասնակցել է Հայաստանի ու Ֆրանսիայի դրոշներով կազմակերպված երթին` ի նշան հայ-ֆրանսիական բարեկամությանը, որով էլ ազդարարվել է միջոցառման մեկնարկը: Այնուհետև տեղի է ունեցել «Ազատություն, հավասարություն, եղբայրություն» խորագրով լուսանկարների մրցույթ-ցուցահանդեսը, որի քվեարկությանը մասնակցել է նաև Ժոնաթան Լաքոթը:
«Այս պահին Ֆրանսիայի հանրապետությունը Ֆրանսիայում զուգահեռաբար տոնում է հուլիսի 14-ը` մեր ազգային տոնը, և այդ ամբողջն ուղղորդվում է Էյֆելյան աշտարակում կազմակերպված հրավառությամբ, բայց կարծում եմ, որ այս ջերմությունը, արևն ու տաքությունը ոչ մի բանով չեն զիջում տոնը հավուր պատշաճի նշելու այս փոքր քաղաքում` Մասիսում, որը կարողացել է մեզ պարգևել AFFA բարեգործական հիմնադրամը: Հավատացեք, որ մենք` ֆրանսիացիներս, շատ զգացված ենք նրանով, թե որքան եք դուք սիրում Ֆրանսիան, ինչպիսի սեր եք տածում ֆրանսիացի ժողովրդի հանդեպ և ինչպես եք կարողանում պատշաճ կերպով քարոզել ֆրանսիական արժեքները», -ասել է դեսպանը:
Կարդացեք նաև
Հյուրերը շրջել են Ֆրանկոֆոնիայի բուլվարում և հետևել կավագործության ու նկարչության վարպետության դասին, որից հետո համերգային ծրագրով սկսվել է միջոցառման երկրորդ հատվածը: Համերգային ծրագիրը լեցուն էր Հանրապետական գվարդիայի լարային քառյակի նվագակցությամբ Ֆրանսիական բանակի երգչախմբի մենակատար Ժերեմի Դելվերի կատարումներով, որով հիացած էր հանդիսատեսը:
«Հայաստանը շատ ջերմ ու քաղցր երկիր է: Հաճելի էր Մասիսում բացօթյա համերգ ունենալ, հատկապես Արարատի ներքո, հանդիսատեսը շատ լավն էր: Հայերն առանձնանում են իրենց հմայքով: Մասիսի համար մեծ հնարավորություն է ունենալ Ադիբեկյան հիմնադրամ, որը շատ բան է անում քաղաքի և հայ-ֆրանսիական բարեկամության համար»,- ասել է Ժերեմի Դելվերը:
Միջոցառումը եզրափակվել է ֆոտոմրցույթի քվեարկության արդյունքների ամփոփումով և շքեղ հրավառությամբ:
Մասիսի զարգացման հիմնադրամը շահույթ չհետապնդող կազմակերպություն է՝ հիմնադրված 2015 թվականին Adibekyan Family Foundation for Advancement բարեգործական կազմակերպության կողմից՝ Մասիս քաղաքի զարգացումը խթանելու նպատակով։ Հիմնադրամի գործունեության նպատակն է միավորել բնակիչներին Մասիս քաղաքի կյանքի որակի բարելավման գործընթացի շուրջ և ձևավորել ակտիվ ու մտահոգ քաղաքացիների նոր սերունդ, որն ապագայում իր ավանդը կունենա Հայաստանի զարգացման և բարգավաճման գործում:
Հիմնադրամը ստեղծել է Մասիսի երիտասարդական կենտրոնը, որը քաղաքի երիտասարդների նախաձեռնությունների զարգացման, տաղանդի և ընդունակությունների բացահայտման յուրահատուկ հարթակ է: Մասիսի Երիտասարդական կենտրոնը գործունեություն է ծավալում երեք հիմնական ուղղություններով՝ կրթություն, սոցիալական նախագծեր և կամավորություն: Ներկայումս կենտրոն է այցելում մինչև 18 տարեկան 120 երեխա:
Ալվարդ Հարությունյան, Մասիսի զարգացման հիմնադրամի հանրային կապերի պատասխանատու
