Ուղիղ 15 տարի Կապանի «Ազատամարտ» կոմիտեն ղեկավարող Խորեն Հարությունյանը կես կատակ, կես լուրջ ասում է, որ նախագահի պաշտոնը ցմահ է։
«Ամեն տարի ինձ են ընտրում առանց ընտրակաշառքի ու կեղծիքի»,-ասում է նա։ Իշխանափոխությունից հետո, ըստ Խորեն Հարությունյանի, կոմիտեի աշխատանքում ոչինչ չի փոխվել։ Ինքը «ճշտով է միշտ աշխատել»։ Մի քիչ նեղսրտում է Սյունիքից ընտրված պատգամավորների, եւ ոչ միայն նրանց, անուշադրությունից։
«Նախկին օրենսդրում կռվին մասնակցած մի քանի դեպուտատ իրանց ցույց տալու համար մեր անունները տալիս էր։ Այսինքն՝ մեզ չէին մոռացել, ինչ որ տեղ հարցեր լուծվում էին, իսկ հիմա մեր անունը էլ տվող չկա», – նշում է արցախյան գոյամարտի եւ քառօրյա պատերազմի մասնակիցը։
Կարդացեք նաև
Արցախյան գոյամարտում տարածաշրջանից զոհվեց 218 ազատամարտիկ, 300-ը տարբեր աստիճանի վիրավորում ստացան, 18-ն էլ համարվում է անհայտ կորած։ Ապրիլյան քառօրյային էլ երեք զոհ են ունեցել։
Կոմիտեի ֆինանսական միջոցները հիմնականում Զանգեզուրի պղնձամոլեբդինային եւ Կապանի կոմբինատների ներդրումներից են կայանում։ Կան նաեւ անհատներ, որոնք օգնում են։ Հետաքրքիր է, որ տարեցտարի փոխվում է զոհված ազատամարտիկների ընտանիքների, ինչու չէ՝ նաեւ վիրավոր ազատամարտիկների մտածելակերպը։
«Փող խնդրելու հոգեբանությունը, կարծես, վերացել է։ Հիմա փորձում եմ մարդկանց զբաղվածության խնդիրը լուծել։ Իհարկե, գումարներ տրվում են հիվանդանոցի ու բուժման, դժբախտ դեպքերի ժամանակ»,-ասում է մեր զրուցակիցը՝ ավելացնելով որ ազատամարտիկների խնդիրներին մի քիչ հատուկ ուշադրություն է պետք։
Չնայած ուշադրության պակասին՝ անհրաժեշտության դեպքում Խորենն եւ իր ընկեր-ազատամարտիկները կմեկնեն առաջին գիծ։ «Բոլորս էլ այս աշխարհում ժամանակավոր ենք։ Մի օր ծնվել ենք, մի օր էլ մեռնելու ենք, միակ մնայունը հայրենի հողն է , որտեղ դեռ մեր սերունդները պետք է ապրեն։ Հայրենիքի համար պետք է պատրաստ լինես կյանքդ անգամ զոհելու»,-ասում է Խ. Հարությունյանը։
Դավիթ ԱՐՄԵՆՅԱՆ
