Հուլիսի 14-ին, ժամը 18:45-ին Վազգեն Սարգսյանի անվան «Հանրապետական» մարզադաշտում Հայաստան-Իսպանիա հանդիպումով կմեկնարկի ֆուտբոլի Եվրոպայի մինչեւ 19 տարեկանների 2019 թվականի առաջնության եզրափակիչ փուլը:
Հայ ֆուտբոլասերները բացառիկ հնարավորություն են ունենալու անձամբ ներկա լինել ու անմիջականորեն ականատես դառնալ Եվրոպայի այս տարիքային խմբի ուժեղագույն հավաքականների՝ Պորտուգալիայի, Իտալիայի, Իսպանիայի, Ֆրանսիայի, Իռլանդիայի, Նորվեգիայի, Չեխիայի եւ Հայաստանի հավաքականների խաղերին:
Հայաստանի հավաքականը վիճակահանությամբ ընդգրկվել է «A» խմբում, որտեղ մարզիչ Արթուր Ոսկանյանի սաների մրցակիցներն են Պորտուգալիան, Իտալիան եւ Իսպանիան: Հետեւաբար, «B» խումբը կազմել են Չեխիայի Հանրապետությունը, Իռլանդիան, Ֆրանսիան եւ Նորվեգիան:
ՈՒԵՖԱ-ի կանոնակարգի համաձայն բացման խաղի նախօրեին «A» խմբի թիմերի գլխավոր մարզիչները հանդիպեցին լրագրողներին, իսկ «B» խմբի թիմերի մարզիչների հանդիպումը կկայանա վաղը:
Կարդացեք նաև
Կարմինե Նունցիատան՝ Իտալիայի գլխավոր մարզիչը, ասաց. «Մենք խաղալու ենք այնպես, որպեսզի հնարավորինս առաջ ընթանանք: Փորձելու ենք դառնալ մրցաշարի հերոսները: Ֆավորիտներից երկուսը մեր խմբում են ընդգրկված բայց պետք է նայենք առաջ եւ խաղանք:
Հայաստանի հավաքականը շատ լավ է նախապատրաստվել: Կարեւոր է նաեւ տանը խաղալու հանգամանքը: Նրա հետ հանդիպմանը պետք է տրամադրվենք նույն վճռականությամբ եւ ամբողջությամբ նվիրվենք այնպես, ինչպես մյուսների հետ: Ֆուտբոլը լի է բազմաթիվ անակնկալներով եւ Հայաստանը տանը խաղալով կարող է նաեւ անակնկալներ մատուցել»:
Պորտուգալիայի գլխավոր մարզիչ Ֆիլիպե Ռամոսը նշեց. «Բավականին բարդ խումբ է: Թե՛ Իտալիան, թե՛ Իսպանիան ամեն ինչ անելու են, որպեսզի անցնեն հաջորդ փուլ: Հայաստանն առավելություն ունի, որ խաղում է սեփական հարկի տակ: Բնականաբար, մենք նույնպես անելու ենք ամեն բան մրցաշարում ավելի հեռու գնալու համար: Իտալիայի հետ վաղը կայանալիք մեկնարկային հանդիպումից առաջ կարեւոր է, որ վնասվածք եւ ինչ-որ խնդիրներ ունեցող ֆուտբոլիստներ չունենք:
Ես հավատում եմ, որ ձեր թիմում շատ բաներ փոխվել են դրական ուղղությամբ եւ կարծում եմ, որ Հայաստանի հավաքականն այս առաջնությունում իր ասելիքը դեռ ունի»:
Իսպանիայի գլխավոր մարզիչ Սանտի Դենիան էլ ասաց. «Մեր ֆեդերացիայի եւ թիմի ամբողջ նպատակը Եվրոպայի չեմպիոն դառնալն է: Հավակնոտ ենք լինելու: Հասկանում ենք, որ սա երկար ճանապարհ է եւ նպատակին հասնելու համար պետք է տքնաջան աշխատենք: Ժամանելուն պես առաջինը մտածում ենք Հայաստանի հավաքականի հետ բացման խաղի մասին: Վերլուծել ենք ձեր թիմի այս տարի անցկացրած բոլոր խաղերը: Ձեր թիմը շատ լավ է աշխատել, որպես կոլեկտիվ: Ունի պաշտպանության լավ մեխանիզմ՝ հարձակողական մտադրություններով: Եվ այդ ամենին հասել եք նաեւ Խինես Մելենդեսի աշխատանքի շնորհիվ: Պարոն Մելենդեսը 20 տարի աշխատել է մեր ֆեդերացիայում, եղել է իմ ուսուցիչը եւ մարզիչը»:
Սանտի Դենիան նաեւ կատակով ասաց, որ Մելենդեսը տիրապետում է իրենց բոլոր գաղտնիքներին եւ դրանից իրենք շատ անհանգստացած են:
Aravot.am-ի հարցին, թե քանի որ մարզիչը բավականին գովեց Հայաստանի հավաքականը, նրան տեսնո՞ւմ է խմբի հաղթողի դերում, Սանտի Դենիան պատասխանեց. «Սպասում եմ, որ «A» խմբի մրցաշարը կավարտվի միավորների մեծ խտությամբ: Մեր ուսումնասիրությունները ցույց են տալիս, որ ամեն բան հնարավոր է եւ ցանկացած հանգուցալուծման դեպքում չենք զարմանա»:
Աշոտ ՀԱԿՈԲՅԱՆ
