Այն ամենը, ինչն այսօր կատարվում է փողոցներում, համակարգի թերի աշխատանքի հետեւանք է: ՃՈ-ն զբաղվում է միայն վերահսկողությամբ
ՀՀ անկախացումից ի վեր վարորդական իրավունքի տրման գործընթացն արատավոր է եղել, ինչի հետեւանքով վարորդական էթիկան այսօր բացակայում է. մյուս կողմից, երթեւեկության պայմանները բարենպաստ չեն, ճանապարհները կահավորված չեն: Սրանք, ըստ «Վարորդի ընկեր» հ/կ համահիմնադիր Սերգեյ Ղահրամանյանի, ՀՀ-ում ավտովթարների թվի ավելացման պատճառների ընդհանրական պատկերն են:
«Այս տարում 188 օրում արդեն 160 զոհ է եղել ՃՏՊ-ների հետեւանքով: Սա թափ հավաքեց նախորդ տարվա ապրիլ-մայիսյան քաղաքական փոփոխության արդյունքում, երբ շատ վարորդներ իրենց մոտեցումները վերաձեւակերպեցին եւ իրենց ազատություն տվեցին, որը նաեւ ոստիկանության մեղմ քաղաքականության շնորհիվ դարձավ շարունակական անպատժելիություն»,-«Զարկերակ» մամուլի ակումբում լրագրողների հետ հանդիպմանն այսօր հայտարարեց Սերգեյ Ղահրամանյանը:
Կարդացեք նաև
Նրա խոսքով. «Այն ամենը, ինչ այսօր կատարվում է փողոցներում, համակարգի թերի աշխատանքի հետեւանք է: ՃՈ-ն զբաղվում է միայն վերահսկողությամբ»: Սերգեյ Ղահրամանյանի փոխանցմամբ՝ վերջին տասը տարում մեկ գյուղի կամ բարձրահարկ շենքի բնակչության թվի չափով մարդ զոհվել է ՃՏՊ-ների հետեւանքով:
Լուիզա ՍՈՒՔԻԱՍՅԱՆ
