Լեռնագործների, մետալուրգների եւ ոսկերիչների արհեստակցական կազմակերպությունների ճյուղային հանրապետական միության նախագահ Էդուարդ Փահլեւանյանն այսօրվա իր ասուլիսին մասնակցելու հրավիրել էր թե կառավարության, թե պղնձամոլիբդենայինի գործատուների ներկայացուցչի: Սակայն նրա խոսքով՝ վերջինները օբյեկտիվ պատճառով չէին ներկայացել, բայց իրեն լիազորել էին հանդես գալ հայտարարություններով: «Հուլիսի 2-ից Ագարակի պղնձամոլիբդենային կոմբինատում, ակցիա է, որը բերել է կոմբինատի աշխատանքի դադարեցման: Ակցիայի մասնակիցների պահանջները, նպատակները եւ խնդիրները անմիջականորեն իրենց իրավունքները պաշտպանելու, աշխատավարձերը վճարելու պահանջներ են. մասնավորապես, առանձնակի վտանգավոր եւ վնասակար աշխատանքային պայմաններում աշխատանքի վճարումների պահանջները, որոնք չեն վճարվել կամ պատշաճ չեն վճարվել:
Ընդհանուր առմամբ ոլորտի հետ կապված խնդիր կա, որը պետք է լուծել: Եթե ավելի քան հազար աշխատողները որոշակի պահանջներ են ներկայացնում, նշանակում է այդ խնդիրներին լուրջ մոտենալու եւ քննարկելու հարկ կա: Պետք է փնտրել ոչ միայն նախապատճառը եւ այն լուծելու հնարավորությունը, այլեւ պրոֆիլակտիկ քայլեր մշակել, որպեսզի հետագայում նման բաներ չկրկնվեն: Հայաստանում լեռնաարդյունաբերական ոլորտի ցանկացած խոշոր կազմակերպության աշխատանքի դադարեցումը հսկայական վնաս է հասցնում երկրին»,-ասաց Է Փահլեւանյանը:
Բանախոսի խոսքով, Ագարակի պղնձամոլիբդենային կոմբինատի մեկ օրվա չաշխատելու ընդհանուր վնասը գործատուների հաշվարկով կազմում է $ 100 հազար:
«Խնդիրը ոչ այնքան վնասն է, որքան խնդրի լուծման պրոֆիլակտիկան: Երբ ասվեց, որ հրավիրվել էին նաեւ ոլորտային նախարարության եւ գործատուների ներկայացուցիչներ, առավոտյան մենք խոսել ենք եւ պայմանավորվածություն ձեռք բերել, որ ես լիազորվում եմ գործատուի, ոլորտային նախարարության եւ արհմիության՝ փոխհամաձայնեցված խնդրի լուծման տարբերակ առաջարկել: Դա եռակողմ հանձնաժողովի ստեղծումն է, որտեղ կլինեն կառավարության, գործատուի եւ արհմիության կողմից մասնագետ ներկայացուցիչներ: Այդ եռակողմ մարմինը այս փուլում կզբաղվի տվյալ խնդրի լուծման գործերով: Դա ոլորտային պահանջներն ու խնդիրները նորմալացնել սկսելու հնարավորություն է, որը խնդրի լուծման կոնստրուկտիվ քայլ կլինի», վստահեցրեց արհմիության նախագահը եւ կոմբինատի աշխատակիցներին հորդորեց դադարեցնել գործադուլն ու անցնել աշխատանքի:
Կարդացեք նաև
Աշոտ ՀԱԿՈԲՅԱՆ
