«Երբ գալիս էի այստեղ, մտածում էի՝ ի՞նչ ցուցանիշներ կարելի է այստեղ ներկայացնել, որպեսզի դուք մեր էֆեկտիվությունը գնահատեք»,- այսօր հրավիրած ասուլիսում ասաց ԱԺ ֆինանսավարկային եւ բյուջետային հարցերի հանձնաժողովի փոխնախագահ Արտակ Մանուկյանը:
Ինչպես հայտնել ենք, ԱԺ-ում «Իմ քայլը» խմբակցությունը ասուլիս էր հրավիրել՝ ներկայացնելու 6-7 ամսվա իրականացրած աշխատանքները: Հանձնաժողովի նախագահները ներկայացրեցին իրենց կատարած աշխատանքները: Հերթը ֆինանսավարկայինինն էր:
Արտակ Մանուկյանն ասաց, որ քաղաքացիների դիմումների, քաղաքացիների ընդունելության հարցով նախորդ գումարման ԱԺ-ի նույն ժամանակաշրջանի հետ համեմատելով՝ կարող են ասել, որ բավականին ավելացել են. «Հանրության կողմից բավականաչափ մեծ վստահություն կա ԱԺ-ի եւ մասնավորապես մեր հանձնաժողովի հանդեպ: Քաղաքացիների նամակները եւս շատ են»:
Առողջապահության եւ սոցիալական հարցերի հանձնաժողովի աշխատանքները ներկայացնելով՝ Հերիքնազ Տիգրանյանն ընդգծեց, որ 3 նախագիծ, որոնց կառավարությունը բացասական եզրակացություն էր տվել, հանձնաժողովում քննարկման արդյունքում ստացել է դրական եզրակացություն: Սա կարեւոր է այն առումով, որ նախկինում այն նախագծերը, որոնց կառավարությունը բացասական եզրակացություն էր տալիս, արդեն իսկ դատապարտված էին տապալման: Տիգրանյանի խոսքով՝ «Կարեւոր եմ համարում օրենսդրական այն փոփոխությունները, որոնք կատարվեցին կենսաթոշակային օրենսդրության մեջ, որի արդյունքում 80 հազար քաղաքացիներ այլեւս 25 հազարից ներքեւ կենսաթոշակ չեն ստանա, այսինքն, նվազագույն կենսաթոշակի շեմը բարձրացվեց»: Հանձնաժողովը կազմակերպել է քաղաքացիների 4 ընդունելություն, որին մասնակցել է 72 քաղաքացի, նաեւ ոլորտի մասնագիտական հանրույթի հետ ունեցել են փակ եւ բաց ձեւաչափով հանդիպումներ:
Կարդացեք նաև
Լրագրողները Եվրաինտեգրման հարցերի հանձնաժողովի նախագահ Արման Եղոյանին հարցրեցին՝ մամուլը գրել էր, որ դուք Աղվերանում հայտարարել եք՝ այս իշխանության եք եկել 40 տարով, այս տեղեկությունը համապատասխանո՞ւմ է իրականությանը եւ ինչի՞ վրա է հիմնված այդ հայտարարությունը: Եղոյանը պատասխանեց, որ չի համապատասխանում իրականությանը. «Նման պնդում անել որեւէ մեկը չի կարող, նույնիսկ բռնապետական իշխանությունները նման պնդում անել չեն կարող: Մենք ունեինք իշխանություն,որի ներկայացուցիչները նման պնդումներ էին անում, տեսանք ինչ եղավ: Այս արագ զարգացող աշխարհում ասում եմ՝ նույնիսկ բռնապետական իշխանությունները չեն կարող նման հայտարարություն անել, էլ ուր մնաց ժողովրդավարական ճանապարհով ընտրված իշխանությունները: Այս պահի դրությամբ մենք ընտրությունով ստացել ենք 5 տարվա մանդատ, կեսը անցավ, մնաց 4,5-ը»:
Հռիփսիմե ՋԵԲԵՋՅԱՆ
